Масква абвастрае гульню
Расейскія мэдыі паведамляюць: зь пятніцы Беларусі могуць "перакрыць газ". Піша ў сваім блогу Аляксандар Класкоўскі.
Расейскія мэдыі паведамляюць: зь пятніцы Беларусі могуць напалову перапыніць падачу газу. "Газпром" накіраваў у Менск ліст з паведамленьнем, што мае намер прыкруціць вэнтыль прапарцыйна фактычнай аплаце — на 45%.
Красамоўны вось гэты пасаж: "ТАА "Газпром экспарт" паведаміла пра сваё рашэньне датычна Беларусі і замежным спажыўцам газу… "Газпром" зробіць усе магчымыя захады дзеля транспартаваньня расейскага газу цераз тэрыторыю Беларусі цалкам згодна з наяўнымі абавязкамі перад эўрапейскімі пакупнікамі".
Гэта адкрытая перасьцярога ад паўтору газавай вайны. Маўляў, крый божа выкідаць нейкія конікі накшталт "несанкцыянаванага адбору"!
Учора я напісаў пост пад загалоўкам "Масква чакае, каб "кліент сасьпеў". У прыватнасьці, зазначалася: сапраўднага ўдару Крэмль яшчэ не наносіў. Як бачым, за суткі загаловак састарэў. Масква ўжо ня хоча чакаць і абвастрае гульню. Небясьпечную гульню.
Зараз відавочна, што заўчорашні візыт беларускага прэм'ера ў Маскву быў ня проста беспасьпяховым, а правальным. Гэта называецца: пайшоў па шэрсьць...
Увогуле ж мы маем месца з заканамерным абстынэнтным сындромам пасьля бурлівага застольля "братняй інтэграцыі". Патрабаваць "працягу банкету" ўжо не выпадае. Дый вясковыя хітрыкі (падайце на беднасьць пры калясальным бюджэтным прафіцыце!) ў белакаменнай, як бачым, не праходзяць.
Да болей грунтоўнага камэнтаваньня новай калізіі яшчэ дойдзе. А пакуль што паўтару выснову, якую зрабіў некалькі тыдняў таму: "Газіёпа наступае!".
ЗЫ. Прэвэнтыўная рэмарка для аматараў закідаць непатрыятычныя настроі: канешне, па вялікім рахунку "кліенты" — усе мы:( Ад наступу Газіёпы мала нікому не падасца. Хаця на сёньня мы бачым найперш шантаж. І яшчарка будзе адкідаць хвост.
Цяпер чытаюць
Андрэя Пачобута памянялі на лукашэнкаўскіх шпіёнаў, арыштаваных у Польшчы35
Каментары