Namieśnik načalnika Hienštaba: «Što takoje alternatyŭnaja słužba, ja navat nie razumieju»
Biełaruskija vajennyja ŭchilajucca ad kamentaroŭ nakont perspektyŭ uviadzieńnia u krainie alternatyŭnaj słužby.
«Kali hetaja słužba supraćlehłaja vajennaj, dyk navošta jana nam patreba, vajennym. Ja hetaje pytańnie naohuł nie abmiarkoŭvaju. Jano nie dla vajennych», — zajaviŭ na pres‑kanfierencyi 12 červienia načalnik arhanizacyjna‑mabilizacyjnaha ŭpraŭleńnia Hienieralnaha štaba — namieśnik načalnika Hienieralnaha štaba Uzbrojenych sił hienierał‑major Ihar Hłod.
Pavodle jaho słoŭ, «taja słužba, jakaja patrebna dla arhanizacyi nacyjanalnaj biaśpieki Respubliki Biełaruś, vyznačana zakonami i Kanstytucyjaj». «Vajennaja słužba, jaje formy i mietady — terminovaja, pa kantrakcie, słužba ŭ reziervie. Voś try vidy słužby. U inšych viedamstvaŭ jość jašče śpiecyjalnyja vidy słužby. A što takoje alternatyŭnaja, ja navat nie razumieju», — skazaŭ namieśnik načalnika Hienštaba.
I.Hłod ličyć, što ŭ situacyi z arhanizacyjaj alternatyŭnaj słužby pakazalnym źjaŭlajecca prykład Rasii. «Dekłaracyi byli vielizarnyja — jana pryniasie šmat pośpiechu, dyvidendy i plusy. Ale zachłynułasia. Ci jana jość, ci jaje niama — ničoha nie bačna i ničoha nie čutno».
Ihar Hłod skieptyčna stavicca i da idei ŭkrainskaha ministra abarony Anatola Hrycenki, sutnaść jakoj — «nie chočaš słužyć — płaci hrošaj stolki, kab na ich možna było ŭtrymlivać kantraktnika».
«Ja dumaju, u dziaržavy dastatkova hrošaj dla taho, kab zabiaśpiečyć kantraktnuju słužbu va Uzbrojenych siłach. U nas zaraz prachodzić słužbu kala siami tysiač kantraktnikaŭ. Nam hetaha dastatkova. Heta elemient prafiesijanalizacyi armii. Nam dastatkova taho pracenta, jaki jość», — zaznačyŭ namieśnik načalnika Hienštaba.
«Hanarovy abaviazak, jaki vyznačany Kanstytucyjaj, naohuł nie moža być pradmietam torhu ŭ narmalnaj krainie, — dadaŭ načalnik pres‑słužby Ministerstva abarony pałkoŭnik Viačasłaŭ Ramienčyk, jaki braŭ udzieł u pres‑kanfierencyi. — Słužba va ŭzbrojenych siłach — heta pierš za ŭsio mahčymaść, jakuju stvaryŭ narod dla taho, kab navučycca siabie abaraniać. Tut torh nie da miesca».
Kamientary