Aleś Bialacki ŭziaty pad vartu. Kalehi: «Heta źviazana z tym, što my akazvali materyjalnuju padtrymku represavanym»

Kiraŭnik pravaabarončaha centra «Viasna» Aleś Bialacki paśla dopytu ŭ Departamiencie finansavych rasśledavańniaŭ Kamiteta dziaržkantrolu uziaty pad vartu.

Jak paviedamiła pravaabaronca Taćciana Raviaka, Bialacki zatrymany na troje sutak u jakaści padazravanaha pa kryminalnaj spravie, zaviedzienaj pa častcy 2 artykuła 243 Kryminalnaha kodeksa Biełarusi (uchileńnie ad vypłaty sum padatkaŭ, zboraŭ u asabliva bujnym pamiery).

Maksimalnaje pakarańnie pa hetym artykule praduhledžvaje pazbaŭleńnie voli da siami hadoŭ z kanfiskacyjaj majomaści.

Bialacki budzie znachodzicca ŭ SIZA na vulicy Vaładarskaha, paviedamiła pravaabaronca.

Nahadajem, što Bialackaha dastavili ŭ DFR paśla zaviaršeńnia pieratrusu ŭ ofisie arhanizacyi, što na praśpiekcie Niezaležnaści, 78a. Na častku majomaści, jakaja znachodziłasia ŭ ofisie, byŭ nakładzieny aryšt. Z kvatery Bialackaha, dzie pieratrus prajšoŭ raniej, zabrany kampjutar.

Dopyt u departamiencie finansavych rasśledavańniaŭ Kamiteta dziaržkantrolu prajšoŭ u prysutnaści advakata Bialackaha Dźmitryja Łajeŭskaha.

Nahadajem, vice-prezident Mižnarodnaj fiederacyi pravoŭ čałavieka Aleś Bialacki byŭ zatrymany siońnia ŭ rajonie płoščy Pieramohi pryblizna ŭ 17.00. Pra svajo zatrymańnie jon paśpieŭ paviedamić Taćcianie Raviaka. Prykładna praz paŭhadziny žonka pravaabaroncy paviedamiła pa telefonie, što jany z Alesiem znachodziacca doma, dzie pačaŭsia pieratrus. Paśla hetaha žančynie zabaranili razmaŭlać pa telefonie.

Pravaabarončy centr «Viasna», jaki ŭznačalvaje Bialacki, dziejničaje z 1998 hoda. U 1999 hodzie jon byŭ zarehistravany jak respublikanskaje pravaabarončaje hramadskaje abjadnańnie. U kastryčniku 2003 hoda «Viasnu» likvidavali rašeńniem Viarchoŭnaha suda. Pryčynaj likvidacyi staŭ udzieł členaŭ arhanizacyi ŭ nazirańni za prezidenckimi vybarami 2001 hoda. U sakaviku 2004 hoda centr «Viasna» byŭ pryniaty ŭ skład Mižnarodnaj fiederacyi pravoŭ čałavieka. Biełaruskija pravaabaroncy trojčy sprabavali zarehistravać arhanizacyju, ale biespaśpiachova.

«Ja dumaju, heta źviazana z tym, što my akazvali nie tolki pravavuju, ale i materyjalnuju padtrymku achviaram represij. Dumaju, źviazana mienavita z hetym», — zajaviła supracoŭnica «Viasny» Taćciana Raviaka.

Aleś Bialacki — pavažany na ceły śviet pravaabaronca — byŭ abrany vice-prezidentam Mižnarodnaj federacyi pravoŭ čałavieka. Niekalki hod tamu Bialackaha vyłučali na Nobeleŭskuju premiju miru.

U Biełarusi pravaabaroncy «Viasny» akazali dapamohu sotniam, kali nie tysiačam represavanych.

• 0
• 0
• 0
• 0
• 0
• 0
• 0
• 0