Łukašenka daručyŭ prapracavać mahčymaść stvareńnia ŭ Minsku centra sučasnych mastactvaŭ

Jak paviedamlaje pres-słužba prezidenta, takoje daručeńnie kiraŭnik dziaržavy daŭ 30 vieraśnia padčas naviedvańnia Nacyjanalnaha mastackaha muzieja Biełarusi, dzie jon aznajomiŭsia z rabotami, pradstaŭlenymi na Respublikanskaj vystavie sučasnaha vyjaŭlenčaha mastactva «Ziamla pad biełymi kryłami».

Ideju stvareńnia ŭ Biełarusi centra, dzie maładyja mastaki, skulptary i pradstaŭniki inšych kirunkaŭ mastactva zmohuć vystaŭlać svaje raboty, ahučyła adna z maładych mastačak padčas razmovy Łukašenki z tvorčaj moładździu, paviedamlaje pres-słužba. Pavodle słoŭ mastački, takija centry ŭžo dziejničajuć u mnohich haradach śvietu, u tym liku Vilniusie, Kijevie, Maskvie.

Jak adznačyŭ ministr kultury Pavieł Łatuška, pytańnie ab stvareńni centra ŭžo papiarednie prapracoŭvałasia i abmiarkoŭvałasia z prem'jer-ministram Siarhiejem Sidorskim, jość damoŭlenaść i sa staličnymi ŭładami. Jon taksama paviedamiŭ, što «Pryjorbank» hatovy akazać finansavuju padtrymku hetamu prajektu. Papiarednie centr płanujecca raźmiaścić u pustym budynku ŭ parku Čaluskincaŭ.

Łatuška taksama prainfarmavaŭ Łukašenku ab pierśpiektyŭnym płanie raźvićcia Nacyjanalnaha mastackaha muzieja. Pavodle słoŭ ministra, u budučyni vakoł NMM płanujecca stvaryć «muziejny kvartał». Užo raspracavana prajektna-kaštarysnaja dakumientacyja na try čarhi raźvićcia muzieja. Dla ich realizacyi zapatrabujecca kala 150 młrd. rubloŭ.

«U pryncypie ja zhodny. Usio heta treba raśpisać, pradumać, raźmierkavać pa hadach nahruzku», — skazaŭ prezident.

Ciapier muziej raźmiaščajecca ŭ troch budynkach: vuł. Kirava, 25, vuł. Kirava — Lenina, 22, vuł. Lenina, 20. U dvuch druhich budynkach 1950-ch hadoŭ pabudovy, pieradadzienych muzieju ŭ 1989 i 1999 hadach, znachodziacca administracyjnyja i techničnyja słužby muzieja, a taksama niekatoryja fondaschoviščy, paviedamlaje pres-słužba. Jak było adznačana ŭ chodzie naviedvańnia Łukašenkam muzieja, restaŭracyja i śpiecyjalnaje prystasavańnie hetych budynkaŭ nie źniali vostruju patrebu ŭstanovy ŭ dadatkovych płoščach.

U 2006 hodzie paśla 15-hadovaha budaŭnictva byŭ uviedzieny ŭ ekspłuatacyju novy korpus muzieja, što častkova vyrašyła prablemy z pašyreńniem depazitaryja i ekspazicyjnych płoščaŭ, paviedamiŭ dyrektar muzieja Uładzimir Prakapcoŭ. Dalejšaje pašyreńnie, pavodle jaho słoŭ, mahčyma za košt sumiežnych budynkaŭ kala asnoŭnaha budynka NMM. Prakapcoŭ taksama ličyć nieabchodnym stvaryć na novych płoščach nievialikija muziejnyja suvienirnyja mahaziny i kafe. «Siońnia ŭ muzieja niama navat kafe, kubak harbaty vypić niama dzie», — skazaŭ dyrektar.

Alaksandr Łukašenka daručyŭ staršyni Minharvykankama Mikałaju Ładućku znajści pablizu muzieja pamiaškańnie, dzie možna było b adkryć suvienirny mahazin u bolš karotkija terminy, nie čakajučy realizacyi ŭsiaho prajekta.

«Mahčymaja pieradača novych budynkaŭ dazvolić stvaryć u pierśpiektyvie najbolš poŭnuju ekspazicyju (siońnia vystaŭlena tolki 5% usioj kalekcyi muzieja). Na praciahu najbližejšych 10 hadoŭ možna budzie pastupova stvaryć adziny muziejny kompleks, asnaščany nie tolki sučasnaj technikaj, ale i ŭnikalnymi ekspazicyjami, u kalekcyjach jakich budzie dastojna pradstaŭlena biełaruskaje nacyjanalnaje mastactva», — adznačajecca ŭ pres-relizie pa vynikach naviedvańnia Łukašenkam Nacyjanalnaha mastackaha muzieja.

• 0
• 0
• 0
• 0
• 0
• 0
• 0
• 0