Padstavaj dla vykliku ŭ milicyju staŭ dopis u błohu. U pryvatnaści słovy: «Niadaŭna byŭ u Lidzie. Realna čuŭ takija bajki».
Padstavaj dla vykliku ŭ milicyju staŭ dopis u błohu. U pryvatnaści słovy: «Niadaŭna byŭ u Lidzie. Realna čuŭ takija bajki».
13 vieraśnia hrodzienskaha žurnalista Andreja Pačobuta vyklikali na hutarku va Upraŭleńnie pa baraćbie z arhanizavanaj złačynnaściu i karupcyjaj pa Hrodzienskaj vobłaści. «Ja ŭpieršyniu daviedaŭsia, što ŭ tym nieprykmietnym šerym budynku na vulicy Sołamavaj znachodzicca takaja ŭstanova. Za ŭvachodam sočyć kamiera. U dźviery treba zvanić, kab zapuścili ŭ siaredzinu. Na stajancy nieprykmietnyja lehkaviki, ź jakich vychodziać ludzi ŭ cyvilnym charakternaha vyhladu», — dzielicca ŭražańniami ad pachodu na hutarku žurnalist. Milicyjantaŭ zacikaviŭ jahony dopis u internet-dziońniku, dzie jon raspaviadaŭ pra pačutaje ŭ Lidzie. U tym dopisie Pačobut daje spasyłku na artykuł na sajcie «Radyjo Svaboda», u jakim pierakazvajucca čutki ź Lidčyny, što nibyta na «Dažynkach» zabjuć Łukašenku. Da spasyłki žurnalist dadaŭ svajo: «Niadaŭna byŭ u Lidzie. Realna čuŭ takija bajki. A vy Maskva, Kreml, vybary... Lidskija babulki ŭsie lepš viedajuć».
Pa słovach Andreja, milicyjanty byli karektnyja i surjoznyja. Na stale lažaŭ jahony zdymak farmatu A4, zrobleny chutčej za ŭsio padčas adnaho z zatrymańniaŭ. Apytańnie było naładžanaje na zahad sa stalicy.
«U mianie pytali, chto mnie raskazaŭ pra toje, što na «Dažynkach» zabjuć Łukašenku. Ci viedaju ja nieviadomaha dziadulu — hieroja čutak pra zamach u Lidzie».
«Ja admysłova padkreśliŭ milicyjantu, jaki mianie apytvaŭ, što pisaŭ mienavita pra čutki, nazyvajučy pačutaje bajkami», — kaža žurnalist.
Jon miarkuje, što terminovy vyklik jaho ŭ milicyju moža być źviazany sa źjaŭleńniem u internecie skandalnaha rolika ź śviedčańniami «byłoha supracoŭnika adnoj sa śpiecsłužbaŭ Rasijskaj Fiederacyi».
Nahadajem, što čutki pra mahčymy zamach na kiraŭnika dziaržavy padčas «Dažynak» źjavilisia miesiac tamu. U internecie adrazu ž zahavaryli pra toje, što padobnyja čutki ŭźnikajuć nie ŭpieršyniu. Jany hučali ŭ 2002 hodzie na Kareliččynie, kolki hadoŭ tamu na Hłyboččynie.
Kamientary