Źniaty telekanałam «Biełsat» dakumientalny film «Pad prycełam ułady» pra viadomaha biełaruskaha pradprymalnika Valeryja Levanieŭskaha staŭ łaŭreatam XV Ahulnapolskaha prahladu dakumientalnych formaŭ BAZAR u Poznani.
Film, źniaty Mikałajem Vaŭraniukom i Tomašam Janulisam ź biełastockaj redakcyi telekanału «Biełsat», atrymaŭ uznaharodu ŭ katehoryi film-repartaž «za pakazvańnie, nakolki važnym, choć i niebiaśpiečnym jość viadzieńnie pryvatnaha biźniesu ŭ Biełarusi».
«Tolki nie pra palityku, bo heta niebiaśpiečna» — takija słovy možna časta pačuć u Biełarusi. Paradaksalna, što za apošnija 15 hadoŭ u turmy trapili značna bolš biźniesoŭcaŭ, čymsia palityčnych aktyvistaŭ.
Pra heta dakładna viedaje Valeryj Levanieŭski z Horadni, jaki niekalki hadoŭ pravioŭ u turmie. Jaho pasadzili nie za palityčnuju ahitacyju ci baraćbu suprać ułady, a za abaronu miesca pracy drobnych pradprymalnikaŭ.
Jak uładalnik šapiku na haradzienskim rynku jon dobra viedaje ciažkaści, ź jakimi sutykajucca pradprymalniki. Valeryj Levanieŭski baluča adčuvaŭ kožnaje zakručvańnie hajek, kožny novy padatak, čarhovyja farmalnyja patrabavańni.
Pratestujučy suprać dziejańniaŭ uładaŭ, jakija ŭskładniali handal, jon zrabiŭsia viadomym u Biełarusi lideram pradprymalnikaŭ. Na jahony zaklik tysiačy handlaroŭ začyniali svaje šapiki, a rynki biełaruskich haradoŭ zrabilisia centram akcyjaŭ pratestu. Heta pryviało jaho prosta za kraty.
«U žury fiestyvalu pracavali nie tolki asoby, źviazanyja z telebačańniem ci kino, ale i ludzi biźniesu, — havoryć aŭtar filmu Mikałaj Vaŭraniuk. — Ja miarkuju, što ŭ pryznańni ŭznaharody majmu filmu syhrała rolu salidarnaść polskich biźniesoŭcaŭ ź biełaruskimi pradprymalnikami».
Uznaharoda dla filmu «Pad prycełam ułady» — užo druhaja na fiestyvali BAZAR dla telekanału «Biełsat». Letaś u Poznani adznačyli ekanamičnuju prahramu «Salda».
Kamientary