«Nie atrymlivali dyvidendaŭ». Padobna, što «Santa» adkazała na abvinavačvańni «Biełpoła»

U publikacyi pad nazvaj «Šmatpakutny inviestprajekt: chto i jak ratuje mini-CEC na «Biełšynie» pryvodziacca mierkavańni Aleha Vasilčanki, dyrektara «Klin Enierdžy Hrup Bieł», i Dzianisa Krymava, kiraŭnika enierhietyčnaha kirunku hrupy kampanij «Santa». 

Tekst pačynajecca z apisańnia pryčyn, čamu prajekt uvohule źjaviŭsia. Tłumačycca, što jamu ŭžo dvaccać hadoŭ.

Maŭlaŭ, u 2006‑m «Biełšyna» paličyła, što hublaje šmat ciapła praz doŭhi dvuchkiłamietrovy tranzit pary z Babrujskaj CEC-2. Na zavodzie vyrašyli pabudavać ułasnuju mini-CEC, jakaja pracavała b na hazie i vyrablała ź jaho paru i elektryčnaść. Ale ŭłasnych hrošaj nie było, inviestaraŭ taksama nie znachodziłasia. 

Prajekt čatyry hady lažaŭ na papiery, pierad tym jak im zacikaviŭsia biznesmien Aleh Vasilčanka, siońnia — dyrektar «Klin Enierdžy Hrup Bieł». 

U svaim tłumačeńni «Ofis Łajfu» Vasilčanka kaža, što ŭ tyja hady ros intares da małoj enierhietyki, a jeŭrapiejskija banki vydzialali biełarusam tannaje finansavańnie. Abstalavańnie možna było zavieźci biez spłaty mytaŭ, a ŭ budučyni nie płacić padatak na prybytak pry rehistracyi ŭ svabodnaj ekanamičnaj zonie «Mahiloŭ» — tam ža jurydyčna znachodzicca i klijent, «Biełšyna». 

Z takimi arhumientami Vasilčanka zmoh pierakanać inviestaraŭ ź Izraila, dla jakich pracavaŭ, što prajekt z harantavanym klijentam u Biełarusi budzie prybytkovym. Vasilčanka sam staŭ partnioram i dyrektaram, zrabiŭ hety prajekt svajoj hałoŭnaj rabotaj.

Inviestary ŭnieśli ŭ statutny fond $5,5 miljona i dali pazyku jašče na $3,5 miljona. BPS-Śbierbank adkryŭ kredytnuju liniju na $6,5 miljona. 

Ale, piša vydańnie, praź niekalki hadoŭ u izrailskich inviestaraŭ uźnikli prablemy. Jany spynili finansavańnie i pierastali płacić za karystańnie bankaŭskimi hrašyma. Bank admoviŭsia praciahvać finansavańnie, i prajekt byŭ spynieny. Niezmantavanaje abstalavańnie vychodziła z ładu. 

«Stała vidavočnym, što biez pryciahnieńnia novaha inviestara «Klin Enierdžy Hrup Bieł» pahražaje bankructva. Abaviazki kampanii ŭžo pieravyšali realny košt aktyvaŭ», — cytuje «Ofis Łajf» Aleha Vasilčanku. 

Vasilčanka pajšoŭ u «Santu» da Alaksandra Mašenskaha, tamu što taja mieła hrošy i ekśpiertyzu: na zavodach «Santy» ŭžo stajali ŭłasnyja mini-CEC. 

Vasilčanka tłumačyć, što mieniedžary Mašenskaha hod aceńvali techničnyja, finansavyja i pravavyja aśpiekty raboty z «Biełšynaj», ale ŭ vyniku dali dabro na ŭvachod. 

«Santa» pahasiła abaviazki kampanii pierad izrailskimi inviestarami, a taksama zapazyčanaść pierad bankam, a taksama dała pazyku i vystupiła paručalnikam pa novym kredycie na 6,2 miljona jeŭra ad Alfa-Banka.

U vyniku ŭ 2019‑m budaŭnictva mini-CEC było skončana. 

Tut aŭtar tekstu padychodzić da tonkaha momantu — apisańnia miechanizmaŭ źnižak i taho, chto na čym ekanomić. 

Vydańnie tłumačyć, što ŭ 2018 hodzie dziaržava dała «Biełšynie» źnižku na elektraenierhiju ŭ pamiery 35%. 

Mieniedžar «Santy» Dzianis Krymaŭ tłumačyć, što heta aznačała na praktycy pavodle damovaŭ ich kampanii z «Biełšynaj»: «My […] pavinny byli pradavać elektraenierhiju sa źnižkaj 5% da taryfa, jaki dziejničaje dla zavoda. Atrymlivałasia, što rašeńnie pra źnižku dziaržava pryniała, kab padtrymać zavod. Ale płacić jaje praz umovy damovy pavinny byli my, adpuskajučy elektraenierhiju pa canie, sfarmiravanaj jak «taryf minus 35% źnižki minus 5% pa damovie». Prodaž elektraenierhii sa źnižkaj, blizkaj da 40%, pry adnačasovaj apłacie nami hazu pa poŭnaj canie farmiravaŭ by admoŭny hrašovy patok ad biahučaj i finansavaj dziejnaści».

Pa słovach Krymava, razhladałasia niekalki varyjantaŭ vychadu: prodaž mini-CEC «Biełšynie» abo «Biełenierha»; dazvoł na tranzit i prodaž enierhii inšym zavodam «Santy» ŭ inšych abłaściach; prodaž enierhii «Biełšynie» sa źnižkaj 40% ale z kampiensacyjaj strat adpaviednym źnižeńniem cany na haz, ź jakoha hetaja enierhija vyrablajecca.

Najlepšym dla «Santy» varyjantam byŭ druhi, tłumačyć Krymaŭ, ale ŭłady nie dazvolili tranzit elektraenierhii pamiž abłaściami — a ŭ Mahiloŭskaj vytvorčaściaŭ u Mašenskaha nie było. 

Tamu ŭ vyniku spynilisia na inšaj schiemie, pa jakoj užo pracavaŭ enierhakompleks «Krasnasielskbudmateryjałaŭ», pabudavany kampanijaj «Mižnarodny enierhietyčny centr» (adzin z akcyjanieraŭ — Bank BiełVEB).

Zhodna ź joj, «Klin Enierdžy Hrup Bieł» pieradaŭ mini-CEC u arendu «Biełšynie» i ŭziaŭ na siabie akazańnie pasłuh pa jaje ekspłuatacyi svaim piersanałam. «Santa» akuplała ŭkładańni, atrymlivajučy arendnuju płatu i płatu za akazańnie pasłuh pa ekspłuatacyi. Metavaja źnižka na haz pry hetym davałasia naŭprost «Biełšynie».

Ciapier, piša «Ofis Łajf», mini-CEC praciahvaje funkcyjanavać, «dziakujučy čamu «Biełšyna» z krasavika 2019‑ha i pa vierasień 2025‑ha sekanomiła na apłacie enierhii bolš za 7 miljonaŭ rubloŭ, a dziaržava sekanomiła bolš za 20 miljonaŭ kubamietraŭ hazu».

Mieniedžier «Santy» Dzianis Krymaŭ u finale tekstu reziumuje, što, pavodle raźlikaŭ, kampanija zmoža viarnuć układzienyja srodki praz 7 hadoŭ z momantu ŭvodu mini-CEC u ekspłuatacyju. 

U kampanii «Klin Enierdži Hrup Bieł» pry hetym padkreślivajuć, što jašče ni razu nie raźmiarkoŭvali prybytak i nie vypłačvali ŭdzielnikam dyvidendy. Uvieś atrymany prybytak idzie na pahašeńnie kredytaŭ i abaviazkovyja pryrodaachoŭnyja mierapryjemstvy.

• 5
• 0
• 1
• 1
• 0
• 0
• 0
• 0