Palityčny aktyvist i prychilnik Trampa Čarli Kirk, u jakoha ŭčora stralali ŭ Jucie, pamior
U palityčnaha aktyvista i prychilnika Trampa Čarli Kirka strelili ŭčora padčas jaho vystupu ŭ kampusie Univiersiteta štata Juta — Utah Valley. Kirk atrymaŭ ranieńnie ŭ šyju. Jaho dastavili ŭ balnicu ŭ krytyčnym stanie. Praz paru hadzin prezident ZŠA Donald Tramp skazaŭ, što Kirk pamior, piša Bi-bi-si.
Tramp abviaściŭ u svajoj sacyjalnaj sietcy Truth Social, što zahadaŭ u znak žałoby na čatyry dni, da viečara niadzieli, pryspuścić ściahi pa ŭsioj krainie.
«Vialiki i navat lehiendarny Čarli Kirk miortvy. Nichto nie razumieŭ i nie spačuvaŭ moładzi ŭ Złučanych Štatach Amieryki lepš, čym Čarli. USIE jaho lubili i zachaplalisia im, asabliva ja, a ciapier jaho bolš niama z nami. Miełanija i ja vyražajem spačuvańni jaho cudoŭnaj žoncy Erycy i siamji. Čarli, my lubim ciabie!», — napisaŭ Tramp.
31-hadovy Čarli Kirk — viadomy prychilnik Trampa i viadučy padkastaŭ, jon zasnavaŭ studenckaje abjadnańnie Turning Point USA dla prasoŭvańnia kansiervatyŭnych kaštoŭnaściej u škołach, kaledžach i univiersitetach.
U Kirka stralali z adlehłaści ad 100 da 200 mietraŭ. Spačatku miascovyja ŭłady zajavili, što zatrymali padazravanaha ŭ napadzie, ale paźniej vyśvietliłasia, što strałok pakul nie zatrymany.
Zatym, praź niekalki hadzin paśla zabojstva, kiraŭnik FBR Keš Patel abviaściŭ, što za heta złačynstva zatrymany niejki čałaviek, ale jašče praz try hadziny paviedamiŭ u sietcy X, što hety čałaviek paśla dopytu byŭ adpuščany.
Jašče praź niekatory čas, poźnim viečaram (u Jeŭropie była hłybokaja noč), Departamient hramadskaj biaśpieki štata Juta abviaściŭ, što paśla zabojstva Kirka byli zatrymanyja dva čałavieki, ale ich abodvuch adpuścili, vyjaviŭšy, što jany nie majuć dačynieńnia da hetaha złačynstva.
U zajavie departamienta taksama skazana, što zabojca — pošuki jakoha praciahvajucca — stralaŭ u Kirka prycelna z dachu budynka, što znachodzicca niepadalok.
Prezident ZŠA Donald Tramp paśla zamachu zaklikaŭ malicca za Kirka. «My ŭsie pavinny malicca za Čarli Kirka, u jakoha stralali. Vydatny chłopiec va ŭsich adnosinach. Boža, błasłavi iz», — napisaŭ Tramp u svajoj sacsietcy Truth Social.
Hubiernatar štata Juta, respublikaniec Spensier Koks zajaviŭ, što heta było zabojstva pa palityčnych matyvach.
«Heta čorny dzień dla našaha štata. Trahičny dzień dla našaj krainy. Chaču jasna zajavić: heta — palityčnaje zabojstva», — skazaŭ hubiernatar Koks žurnalistam. Čarli Kirk (albo Kiork, Charlie Kirk) byŭ adnym z samych viadomych dziejačaŭ kansiervatyŭnaha kryła ŭ amierykanskaj palitycy i blizkim sajuźnikam Donalda Trampa.
Chto taki Čarli Kirk?
Jon vioŭ padkasty i pravodziŭ palityčnyja debaty na adkrytym pavietry va ŭniviersiteckich kampusach pa ŭsioj krainie.
U 2012 hodzie, va ŭzroście 18 hadoŭ, jon staŭ suzasnavalnikam ruchu Turning Point USA (TPUSA) — studenckaj arhanizacyi, jakaja zajmajecca prasoŭvańniem kansiervatyŭnych idej i kaštoŭnaściej u amierykanskich kaledžach i ŭniviersitetach, dzie ŭ apošnija hady stali papularnyja novyja levyja idei i płyni — u amierykanskaj palityčnaj movie ich nazyvajuć «libieralnymi».
Arhanizacyja Turning Point USA dekłaruje, što jaje zadača — «prasoŭvańnie pryncypaŭ finansavaj adkaznaści, volnaha rynku i abmiežavanaha dziaržaŭnaha ŭmiašańnia». Jačejki TPUSA dziejničajuć u bolš čym 850 kaledžach.
Akramia debataŭ va ŭniviersitetach, Čarli Kirk dzialiŭsia svaimi dumkami z mnohimi miljonami padpisčykaŭ u sacsietkach, a taksama jeździŭ pa krainie, vystupajučy na roznych mierapryjemstvach respublikancaŭ.
TPUSA adyhrała važnuju rolu ŭ mabilizacyi vybarcaŭ Trampa ŭ minułym hodzie. Asabista Čarli Kirk dapamoh aktyvizavać i prymusić zarehistravacca dziasiatki tysiač novych vybarcaŭ u Aryzonie, što, jak ličycca, dazvoliła Trampu pieramahčy ŭ hetym štacie.
Kirk byŭ zaprošany na inaŭhuracyju Trampa ŭ studzieni hetaha hoda, a da i paśla hetaha, padčas abodvuch prezidenckich terminaŭ Trampa, rehularna byvaŭ u Biełym domie.
Kamientary
Jaki byŭ čałaviek - tak i pamior :)