Kitajskaja armija zaniała sprečny ryf Sendzi-Kiej u Paŭdniova-Kitajskim mory
Kitajskija vajskoŭcy zaniali biaźludny ryf u Paŭdniova-Kitajskim mory, paviedamlaje Financial Times. Heta moža mocna abvastryć kitajska-filipinskija adnosiny. A Filipiny — važny rehijanalny sajuźnik ZŠA.
Jak paviedamlaje telekanał CCTV, kitajskija pamiežniki ŭźniali na ryfie ściah KNR, aficyjna abviaściŭšy jaho svajoj terytoryjaj. Sendzi-Kiej znachodzicca ŭsiaho za niekalki kiłamietraŭ ad filipinskaha vostrava Citu, dzie raźmieščanaja adna z najvažniejšych vajskovych baz Maniły.
Heta pieršy za mnohija hady vypadak, kali Piekin, jaki pretenduje praktyčna na ŭsiu akvatoryju Paŭdniova-Kitajskaha mora, aficyjna ŭstaloŭvaje svoj ściah na raniej niezaniatym abjekcie.
Padzieja adbyłasia na fonie zapłanavanych sumiesnych filipina-amierykanskich vučeńniaŭ Balikatan — najbujniejšych štohadovych manieŭraŭ, jakija buduć uklučać adpracoŭku bierahavoj abarony i zachop astravoŭ. Pačynajucca jany na nastupnym tydni na filipinskaj terytoryi.
Choć ryf Sendzi-Kiej — usiaho tolki piasčanaja kasa płoščaj krychu bolš 200 kv.m, jon daje prava na terytaryjalnyja vody ŭ radyusie 12 marskich mil. Heta stavić pad pahrozu bazu manitorynhu na Citu, dzie Maniła ŭzmacniaje infrastrukturu.
Adnosna hetaha incydentu piša ŭ svaim telehram-kanale palityčny analityk Alaksandr Frydman:
«Na hety momant składana acanić mety i maštab kitajskaj pravakacyi na niezasielenym vostravie Sendzi-Kiej u Paŭdniova-Kitajskim mory. […]
Kanflikty z Vjetnamam i Filipinami — zvyčajnaja praktyka dla Piekina. Čas dla novaj pravakacyi byŭ abrany nievypadkova: kanflikt pamiž Indyjaj i Pakistanam (apošni źjaŭlajecca sajuźnikam Kitaja) pahražaje pieraraści ŭ vajnu ź jadziernaj pierśpiektyvaj, adnosiny pamiž ZŠA i Kitajem imkliva paharšajucca, a ŭviedzienyja administracyjaj Trampa myty nanieśli škodu suviaziam ZŠA ź ich partniorami — Vjetnamam i Filipinami.
Akramia taho, Bieły dom ciapier zasiarodžany na vajnie va Ukrainie i pieramovach ź Iranam, i jamu, vidavočna, nie da Vjetnama i Filipin. U Jeŭropie ŭvaha prykavanaja da vajny va Ukrainie, a vostraŭ Sendzi-Kiej zdajecca dalokim i niavažnym. Adnak heta ŭražańnie zmanlivaje.
Kitajskaja pravakacyja nahadvaje pra scenar prafiesara Univiersiteta Bundeśviera ŭ Miunchienie Karła Masały, vykładzienym u jaho biestselery «Kali Rasija pieramoža», apublikavanym u sakaviku hetaha hoda.
U hetym scenary, pabudavanym na analitycy ekśpiertaŭ i na źviestkach zachodnich śpiecsłužbaŭ, Rasija ŭ kancy sakavika 2028 hoda testuje NATA, zachoplivajučy estonski horad Narvu i vostraŭ Chijumaa. Za miesiac da hetaha, pa prośbie Maskvy, Kitaj ździajśniaje manieŭr dla adciahvańnia ŭvahi — zachop filipinskaha ryfa, na jaki pretenduje Piekin.
U madeli Masały Vašynhton nie akazvaje Manile pramoj padtrymki, a pačynaje zakulisnyja pieramovy ź Piekinam, imknučysia paźbiehnuć eskałacyi i vajennaha sutyknieńnia z KNR. Nie vyklučana, što ŭ vypadku z vostravam Sendzi-Kiej ZŠA paviaduć siabie anałahičnym čynam, kali, viadoma, kitajcy sami nie pakinuć jaho.
Ci hulaje Kitaj svaju asobnuju partyju? Ci kaardynuje jon svaje dziejańni z Rasijaj? Jakaja rola adviedziena Pakistanu? Adkazy na hetyja pytańni my atrymajem u najbližejšy čas.
Scenaryi zastajucca ŭsiaho tolki scenaryjami. Ale ŭ naš čas navat samyja tryvožnyja i, na pieršy pohlad, nievierahodnyja ałarmisckija prahnozy varta ŭsprymać surjozna».
Kamientary
Pradbaču, što miascovyja nievierahodnyja salidaryzucca z Kitajem suprać amierykancaŭ, katoryja na vybarach abrali taho, kaho paličyli patrebnym. Chomo saviecikus nie da spadoby vybar amierykancaŭ.