Ustanova pracavała amal dva hady. Uładalniki bara raspaviali Most pra pryčyny zakryćcia i dalejšyja płany.
«Karabiel zastaŭsia biez šturvała i vietraziaŭ»
Pavodle słoŭ Alaksieja Navumienki, uładalnika bara, pryčyna zakryćcia «prostaja i banalnaja» — kamanda stamiłasia i maralna, i fizična.
— My narabili mnostva pamyłak. Padčas štormu naš karabiel zastaŭsia biez šturvała i vietraziaŭ. U peŭny momant my zastalisia bieź mieniedžmientu, i tolki dziakujučy kamandzie praciahvali płyć, — raspavioŭ Alaksiej.
Biznesoviec adznačaje, što kancepcyja, ź jakoj jany vychodzili na polski rynak, pierastała być aktualnaj. Rašeńnie ab zaviaršeńni prajekta dałosia ŭładalnikam ciažka.
— My ŭkładali siły, dušu i emocyi ŭ bar na praciahu dvuch hadoŭ, pracavali pa 250 i bolš hadzin u miesiac. Ale pryjšoŭ čas ruchacca dalej, — dadaje biełarus.
Naviedać ustanovu možna budzie da 4 maja. Zapłanavanyja mierapryjemstvy admianiać nie buduć. Uładalniki chočuć sustrecca z haściami i «dać finalny akord».
— U nas užo jość niekalki idej, jakija nam cikava realizavać u budučyni. Majučy dośvied na hetym rynku, dumajem, što budzie praściej. Ale my bolš nie budziem zalatać u prajekty čysta dziela fanu — heta abyšłosia nam doraha, — reziumuje pradprymalnik.
Alaksiej dadaje, što kali siarod biełarusaŭ znojducca zacikaŭlenyja ŭ pamiaškańni pad hastranamičny biźnies, kamanda BackDoor z radaściu pieradaść arendu.
Čym viadomy BackDoor
Historyja BackDoor pačynałasia ŭ Minsku — ustanova pracavała na vulicy Kastryčnickaj. U 2023 hodzie ŭładalniki pierajechali ŭ Polšču. Pravy na minskuju ŭstanovu pradadzieny, a ŭ Varšavie źjaviŭsia adnajmienny bar. Aficyjnaje adkryćcio BackDoor adbyłosia ŭ traŭni 2023 hoda.
U polskaj stalicy BackDoor znachodzicca pa adrasie Chmielna 7/9 i śpiecyjalizujecca na burhierach, u tym liku viehietaryjanskich. Taksama ŭ mieniu — fry, načas, a ŭ ałkaholnaj karcie — kraftavaje piva i ałkaholnyja kaktejli.
Pieryjadyčna ŭ bary prachodzili kancerty z udziełam biełaruskich i ŭkrainskich muzykaŭ, a taksama viečary stendapu i tranślacyi futbolnych matčaŭ.
U listapadzie 2023 hoda pamiž ułaśnikami adbyŭsia kanflikt. Tady adzin z uładalnikaŭ, były palitviazień Lavon Chałatran, zajaviŭ pra vychad z prajekta.
Kamientary