Jak žyvie Vital Tysieŭ — aktyvist, jakomu biełarusy sabrali 45 tysiač jeŭra na terminovuju apieracyju i ŭratavali ad paraliču

Šmat hadoŭ tamu Vital pieražyŭ traŭmu chrybietnika, jakaja nie pieraškadžała jamu žyć i pracavać. Ale ŭ 2020-m biełarus trapiŭ pad aryšt, i heta spravakavała abvastreńnie chvaroby. U Vitala raźviŭsia ankiłazirujučy spandylit, zraślisia ŭsie sustavy pazvanočnika i inšyja sustavy. 

Spatrebiłasia terminovaja apieracyja, kab mužčynu nie paralizavała. Za spravu ŭzialisia miedyki ź niamieckaj kliniki «Šaryte». Hrošy na apieracyju — bolš za 45 tysiač jeŭra — dapamahli sabrać nieabyjakavyja biełarusy.

Vital raskazvaje, što ŭ apošni čas chodzić z dapamohaj mylicy, chacia paśla apieracyi i moh chadzić całkam samastojna. Usio praz toje, što apieracyja nie dazvoliła całkam vyrašyć jaho prablemu:

«U mianie całkam vydalili adzin pazvanok u šyi i zamiest jaho pastavili pratez, ale jon karotki, i treba jaho padaŭžać. Troški niedarabili apieracyju, bo tady byŭ taki stan, što bajalisia rabić bolš.

Pavialičyć

Atrymlivajecca, što horb jany nie vyraŭniali. Postać źmianiłasia, praz heta atrymlivajecca vialikaja nahruzka na tazaściohnavyja sustavy. I praz heta ŭ mianie abvastrylisia prablemy z nahami, jany balać».

Ciapier Vitalu patrebnaja novaja apieracyja — treba padoŭžyć pratez. Ale jaho ciapierašni stan nie pahražaje žyćciu, i tamu apieracyju možna adkłaści. Vital razdumvaje nad tym, kab uvohule ad jaje admovicca, bo apieracyja kaštuje niamała.

Tysieŭ žyvie ŭ Ščecinie, na miažy Polščy i Hiermanii. Na žyćcio jon zarablaje elektronikaj — ramantuje noŭtbuki i telefony.

Polšča dała biełarusu status invalida i štomiesiac płacić dapamohu, ale Vital chacieŭ by atrymlivać piensiju pa invalidnaści. Dla hetaha patrebny strachavy staž, a biełaruskija ŭłady nie pieradajuć palakam patrebnuju infarmacyju pra Vitala:

«Dapamoha — heta časovyja vypłaty. A mnie naležyć pažyćciovaja piensija, u mianie adpracavana dastatkova času na terytoryi Biełarusi. U mianie kala 30 hadoŭ stažu, i mnie pavinny płacić piensiju, bo jość pahadnieńnie pamiž Polščaj i Biełaruśsiu pra ŭzajemnyja vypłaty.

Pavialičyć

Ale pakolki ja palityčny, biełaruski bok prosta tarmozić, nie paćviardžaje maje danyja pra staž. A palaki nie mohuć mnie dać piensiju, bo ŭ mianie mała pracoŭnaha stažu ŭ Polščy, mnie treba minimum 5 hadoŭ».

Hetaja epapieja, kaža Vital, ciahniecca ŭžo treci hod. Polskija sacyjalnyja słužby pišuć jamu listy i paviedamlajuć, što jany źviazvajucca ź biełaruskimi kalehami, a tyja admaŭlajucca paćvierdzić danyja. Pry hetym u Vitala jość pracoŭnaja knižka, pierakładzienaja na polskuju movu, ale dla Polščy biełaruskaja pracoŭnaja knižka — nie dakumient.

Mužčyna tłumačyć, što kali b jaho pieraviali na piensiju, to jon atrymlivaŭ by prykładna tyja ž hrošy, jakija jamu płacić Polšča ŭ jakaści dapamohi — 1500 złotych (prykładna 350 jeŭra). Ale pry hetym jamu nie treba było b kožnyja try miesiacy prachodzić abśledavańnie i dakazvać, što dapamoha jamu ŭsio jašče naležyć. Taksama piensiju možna atrymlivać i ŭ inšych krainach, a dapamohu vypłačvajuć, tolki kali pastajanna znachodzišsia ŭ Polščy.

Vital kaža, što jaho žyćcio składajecca ciapier i z pryjemnych momantaŭ, i čas u zamiežžy jaho nie źmianiŭ:

«Navučyŭsia hulać u biljard, narmalna atrymlivajecca. Adzinaje, što postać nie dazvalaje tak vyhnucca, kab možna było narmalna kijem udaryć, tamu davodzicca vykarystoŭvać padstaŭku.

A Łukašenku nienavidžu, hetaksama jak i Pucina, ničoha nie źmianiłasia. Babachnie čarhovaja revalucyja — budu na miažy z aŭtamatam».

• 34
• 1
• 2
• 0
• 1
• 12
• 0
• 5