Jak za hod źmianiłasia kolkaść biełarusaŭ u Litvie. Ličby ŭražvajuć

Pavodle aficyjnaj statystyki, pa stanie na 1 krasavika 2025 hoda ŭ Litvie zastałosia 53 739 hramadzian Biełarusi ź dziejnymi DNŽ.

Heta na 3772 čałavieki mienš, čym było ŭ pačatku hoda. 

Pavialičyć

U paraŭnańni z 1 krasavika 2024 hoda, kali DNŽ u Litvie mieli 62844 biełarusy, adtok skłaŭ 9105 čałaviek, ci amal 15%.

Niahledziačy na toje, što kolkaść hramadzian Biełarusi ŭ Litvie i tak skaračajecca, niekatoryja litoŭskija palityki praciahvajuć prapanoŭvać novyja abmiežavańni dla biełarusaŭ. 

U sakaviku try parłamientaryi ź liku kansiervataraŭ (Łaŭrynas Kaščunas, Aŭdronius Ažubalis i Vałdas Rakucis) zarehistravali prapanovu, dzie siarod inšaha idzie razmova pra anulavańnie ŭžo vydadzienych DNŽ u vypadku, kali hramadzianie Biełarusi na praciahu troch kalandarnych miesiacaŭ bolš za adzin raz jeździli na radzimu. Členy kamiteta Siejma pa nacyjanalnaj abaronie adnahałosna padtrymali prapanovu kansiervataraŭ. Hetyja prapanovy taksama byli padtrymanyja pradstaŭnikami prezidenckaj administracyi i Departamienta dziaržaŭnaj biaśpieki Litvy, ale padvierhlisia krytycy z boku biznes-arhanizacyj.

Hienieralny dyrektar Mižnarodnaha transpartna-łahistyčnaha aljansu Poviłas Dryžas śćviardžaje, što ŭ transpartnych kampanijach Litvy pracujuć kala 36 tysiač biełarusaŭ i paśla ŭviadzieńnia sankcyj ich kolkaść pačała źmianšacca.

Niahledziačy na toje, što dla pieravozčykaŭ i kiroŭcaŭ hruzavikoŭ, što jeduć tranzitam praz Rasiju i Biełaruś (a taksama ŭ vypadkach, kali pajezdka mieła abjektyŭnyja pryčyny, niezaležnyja ad hramadzianina), buduć prymianiacca vyklučeńni, pryniaćcie novych abmiežavańniaŭ moža prynieści prablem litoŭskamu transpartna-łahistyčnamu biznesu.

Pavialičyć

Reč u tym, što bolšaść biełarusaŭ, jakija pracujuć kiroŭcami-mižnarodnikami ŭ litoŭskich firmach, vykonvajuć rejsy pa Jeŭrasajuzie, a ŭ Litvie byvajuć tolki niekalki dzion na hod, kali jeduć na kadencyju i nazad. Zvyčajna kadencyja doŭžycca šeść abo vosiem tydniaŭ, paśla čaho kiroŭca viartajecca na bazu ŭ Litvu i adtul na 2-3 tydni jedzie ŭ Biełaruś.

To-bok miažu jany pierasiakajuć nie na fury jak kiroŭcy, a jak prostyja hramadzianie. Takim čynam, biełaruskim dalnabojščykam daviadziecca pracavać minimum pa try miesiacy, kab nie pieravysić limit, abo šukać pracu ŭ inšych krainach ES, dzie padobnych abmiežavańniaŭ niama. Letaś «Naša Niva» hutaryła na hetuju temu z dalnabojščykami, tady bolšaść schilałasia da taho, što źmieniać krainu pracy, kali Litva ŭviadzie padobnyja abmiežavańni.

Admietna, što havorka pra padobnyja abmiežavańni viałasia i minułaj viasnoj. U 2024-m kamitet Siejma pa nacyjanalnaj biaśpiecy i abaronie Litvy ŭchvaliŭ prapanovu abmiežavać kolkaść pajezdak na radzimu hramadzianam Biełarusi i Rasii, ale tady Siejm nie padtrymaŭ hetuju inicyjatyvu.

• 6
• 1
• 4
• 21
• 0
• 7
• 0
• 0