Hreki suprać pieramien

Apošnim časam Hrecyja źjaŭlajecca adnym z hałoŭnych pastaŭščykoŭ navin ŭ ES. To anarchisty pratestujuć, to ES vyrašaje akazać Hrecyi dapamohu biesprecedentnaha pamieru, to ahulnanacyjanalny strajk pačynajecca. Sioj-toj navat zahavaryŭ ab mahčymym vyklučeńni hetaj mižziemnamorskaj krainy ź jeŭrazony. Što ž nasamreč adbyvajecca ŭ Afinach?

Naprykancy minułaha hodu ekśpierty hreckaha Fonda ekanamičnych i pramysłovych daśledavańniaŭ (IOBE) zajavili pra toje, što krainie, u suviazi z palityčnaj i ekanamičnaj niestabilnaściu, pahražaje šyrokamaštabny sacyjalny kryzis.

Źniešniaja zapazyčanaść Hrecyi na toj momant užo pieravysiła 300 miljardaŭ jeŭra, pryčym tolki ŭ 2009 hodzie kraina pazyčyła kala 80 miljardaŭ, abo 30% VUP.

Biudžetny deficyt skłaŭ rekordnyja dla jeŭrazony 12,7% VUP.

Pryčyn hetamu niekalki – rost dziaržaŭnaha aparatu i zarobkaŭ u dziaržsiektary, rezkaje padvyšeńnie vydatkaŭ na piensii i ŭchileńni ad vypłaty padatkaŭ. Ale hałoŭnaja – kryzis, jaki padkasiŭ turystyčnuju śfieru – asnoŭnuju krynicu prybytkaŭ krainy.

Niahledziačy na toje što Hrecyja źjaŭlajecca krainaj ES, dziaržaŭnaja majomaść tam nie na apošnim miescy ŭ haspadarcy. Adpaviedny i dziaržaŭny aparat, jaki pahłynaje vialikija srodki.

Dziaržava vałodaje 77% akcyj najbujniejšaha Ahrabanka i 34% paštovaha banka, błakujučymi abo kantrolnymi pakietami ŭ elektryčnaj i telefonnaj manapolijach. Akramia hetaha, dziaržavie naležyć nacyjanalnaja hazavaja kampanija DEPA i apieratar hazatranspartnaj sistemy DESFA, taksama urad vałodaje hruzavymi partami krainy i manapolijaj na hulniavy biznes, nieruchomaściu.

Levacentrysty, jakija pryjšli da ŭłady ŭ Hrecyi ŭ kastryčniku 2009 hoda, adrazu ŭzialisia za reformy. Byli pradadzienyja nacyjanalny avijapieravozčyk Olympic Airlines, błakujučy pakiet akcyj nacyjanalnaj telekamunikacyjnaj kampanii OTIE, i hruzavy partovy terminał u Pirei. Adnak navat takija niaznačnyja pryvatyzacyjnyja kroki ŭładaŭ sutyknulisia z pratestami nasielnictva – jany prachodzili na fonie masavych pratestaŭ rabotnikaŭ.

Zaraz da ich dadałasia i niezadavolenaść režymam žorstkaj ekanomii. Hrecyja paralizavanaja, a tym časam inviestycyjny klimat u krainie paharšajecca z kožnym miesiacam. Asabliva heta zaŭvažna ŭ turystyčnaj śfiery, jakaja raniej štohod prynosiła da 60% VUP, a zaraz, praz suśvietny ekanamičny kryzis, znachodzicca ŭ stahnacyi.

U vyniku urad krainy apynuŭsia ŭ niepryjemnym stanoviščy. Z adnaho boku ES, jaki patrabuje pravieści refarmavańnie ekanomiki krainy ŭzamien na čarhovyja lhotnyja kredyty, a ź inšaha – ułasnyja hramadzianie, jakija žadajuć, jak i raniej, pracavać na dziaržaŭnych pradpryjemstvach i va ŭstanovach, nie bajučysia skaračeńniaŭ.

• 0
• 0
• 0
• 0
• 0
• 0
• 0
• 0