«Jak Polšča niekali prajšła šlach da voli, hetak i biełarusy zrobiać toje ž samaje». Cichanoŭskaja vystupiła na Forumie Kaściuški

Prahrama mierapryjemstvaŭ pačałasia ŭskładańniem kvietak da pomnika sudnavym rabočym horada, jakija zahinuli padčas trahičnych padziejaŭ śniežnia 1970 hoda, paviedamlaje jaje pres-słužba.

U vystupie, jaki adkryvaŭ ivent, Śviatłana Cichanoŭskaja padkreśliła: ideały, za jakija zmahaŭsia Kaściuška — svaboda, roŭnaść i narodny suvierenitet — aktualnyja i siońnia. Jana adznačyła, što niezaležnaść i demakratyja patrabujuć nie tolki ŭnutranaj stojkaści, ale i mižnarodnaj padtrymki: 

«Jak Polšča niekali prajšła svoj šlach da voli, hetak i biełarusy zrobiać toje ž samaje. Hety šlach moža być doŭhim, ale heta adziny šlach, jaki treba prajści. Heta adziny sposab zabiaśpiečyć našaje vyžyvańnie i roskvit».

Śviatłana Cichanoŭskaja zaznačyła, što forumam u Hdańsku addajecca pavaha ahulnym zmaharam za svabodu, takim jak Tadevuš Kaściuška i Kastuś Kalinoŭski, — «ludziam, u jakich, mahčyma, było mała šancaŭ na pieramohu, ale jakija ŭsio roŭna vyrašyli zmahacca za spraviadlivaść».

«My addajom daninu pavahi ŭsim biełaruskim žurnalistam, aktyvistam, mastakam, jakija, niahledziačy na represii, niahledziačy na rusifikacyju, praciahvajuć tvaryć, navodzić masty, raspaŭsiudžvać praŭdu i supraćstajać «ruskamu śvietu». I ja prašu našych mižnarodnych siabroŭ, prysutnych u hetaj zale, padtrymać ich krytyčna važnuju pracu, asabliva ciapier, kali amierykanskaja dapamoha była prypynienaja. My addajom daninu pavahi našym palityčnym źniavolenym, uklučajučy Andžeja Pačobuta, Ihara Łosika, Kaciarynu Andrejevu abo Maryju Kaleśnikavu, i tysiačam inšych, jakija znachodziacca za kratami. Jany nie byli złamanyja, i my taksama. Davajcie nie spyniać baraćbu za ich vyzvaleńnie», — skazała Śviatłana Cichanoŭskaja.

Jana taksama zhadała Maryju Zajcavu, jakaja zahinuła va Ukrainie.

«Dla mianie vialiki honar bačyć siarod nas vice-ministra Alaksandra Miščanku. Pavažany vice-ministr, biełaruski narod padtrymlivaje Ukrainu hetak ža, jak vy staicie na pieradavoj za ŭsich nas. My taksama addajom naležnaje ŭsim śmiełym palitykam, jakija nie bajacca vystupić suprać tyranii. Naprykład, prysutnamu tut ministru Kiastucisu Budrysu — našamu litoŭskamu siabru i sajuźniku. Litva nie tolki pryniała tysiačy biełarusaŭ, ale i raspačała spravu suprać režymu ŭ Mižnarodnym kryminalnym sudzie. I my zaklikajem usie krainy padtrymać hetyja namahańni. My nie pavinny paddavacca šantažu dyktataraŭ. I my nikoli nie pavinny zdradžvać našym kaštoŭnaściam», — dadała jana.

• 9
• 0
• 0
• 0
• 0
• 0
• 0
• 0