Pamiatajecie, jak Rasija patrabavała ad Google undycyljony? Ciapier štraf vyras da dvuch duadycyljonaŭ
Suma patrabavańniaŭ rasijskich telekanałaŭ raście, a ŭ sudach vyvučajuć novyja słovy.
Suma, jakuju 17 rasijskich telekanałaŭ patrabujuć ad karparacyi Google, vyrasła da 1,8 duadycyljona rasijskich rubloŭ.
Heta suma nazapasiłasia tamu, što kampanija nie adnaviła akaŭnty rasijskich prapahandysckich ŚMI na YouTube, piša RBK.
Duadycylijon — heta adzinka z 39 nulami. Suma, jakuju ŭ Rasii patrabujuć ad Google, daŭno značna pieravyšaje sumu ŭsich hrošaj na płaniecie.
Paśla pačatku poŭnamaštabnaj vajny YouTube vydaliŭ kanały rasijskich prapahandysckich ŚMI. Paśla hetaha 17 telekanałaŭ, siarod jakich «Rasija», NTV, «Pieršy kanał» i inšyja, padali isk na karparacyju.
Rasijski sud abaviazaŭ Google adnavić akaŭnty i ŭstalavaŭ prahresujučy štraf. Kožny dzień praterminoŭki pavialičvaje sumu na 100 tysiač rasijskich rubloŭ (krychu bolš za tysiaču dołaraŭ), kožny tydzień suma padvojvajecca. Nijakich abmiežavańniaŭ na sumu kančatkovaha štrafu niama.
U kastryčniku 2024 hoda suma štrafu dasiahnuła dvuch undycyljonaŭ rubloŭ — heta adzinka z 36 nulami. Dva ŭndycyljony heta pryblizna 20 dycyljonaŭ dalaraŭ, to-bok adzinak z 33 nulami. Pry hetym sukupnaje čystaje suśvietnaje bahaćcie aceńvajecca ŭ 477 tryljonaŭ dalaraŭ (12 nuloŭ), a kapitalizacyja Alphabet, maciarynskaj kampanii Google, składaje 2,4 tryljona.
Kamientary