Lasnyja pažary ŭ Łos-Andželesie: piać čałaviek zahinuli, u Malibu harać damy znakamitaściaŭ
Situacyju paharšajuć mocny viecier i suchoje nadvorje.
Kolkaść zahinułych u vyniku lasnych pažaraŭ u Kalifornii pavialičyłasia da piaci, piša Bi-bi-si.
«Raniej siońnia my paviedamlali pra dvuch zahinułych. Na žal, kolkaść zahinułych uzrasła da piaci», — skazaŭ šeryf akruhi Łos-Andželes Robiert Łuna.
Pa jaho słovach, pažary pakul nie łakalizavanyja, i kolkaść achviar moža pavialičycca. Situacyju paharšajuć mocny viecier i suchoje nadvorje.
Ułady zajaŭlajuć, što ŭ rajonie Łos-Andželesa praciahvajuć bušavać piać lasnych pažaraŭ, a ŭ zonie evakuacyi pražyvajuć 150 tysiač čałaviek. Płošča najbolš mocnaha pažaru ŭ rajonie Pasifik-Palisiejds pamiž Santa-Monikaj i Malibu pieravyšaje 60 kvadratnych kiłamietraŭ.
Pa słovach načalnika pažarnaj achovy akruhi Łos-Andželes Entani Marone, tam ahoń źniščyŭ nie mienš za tysiaču pabudoŭ. U Malibu na zachadzie akruhi Łos-Andželes znachodzicca šmat damoŭ znakamitaściaŭ.
U sieradu vydańnie TMZ paviedamiła, što na plažy Malibu całkam zhareŭ adzin z damoŭ, jaki naležyć aktorcy i śpiavačcy Perys Chiłtan. Paźniej sama Chiłtan paćvierdziła heta.
«Serca raźbita, nielha pieradać słovami. Siadzieć ź siamjoj, hladzieć naviny i bačyć, jak naš dom u Malibu zharaje daščentu ŭ pramym efiry — heta toje, što nichto nikoli nie pavinien adčuvać. Hety dom byŭ miescam, ź jakim źviazana tak šmat kaštoŭnych uspaminaŭ», — napisała jana ŭ Instagram.
TMZ taksama piša pra inšych viadomych žycharoŭ Łos-Andželesa, čyje damy paciarpieli ad pažaraŭ. Na pres-kanfierencyi ŭ noč na čaćvier ułady paviedamili, što jašče adzin pažar uźnik u rajonie Halivudskich uzhorkaŭ — adnym z samych viadomych rajonaŭ Łos-Andželesa, dzie znachodzicca znakamity znak Halivudu.
Prezident ZŠA Džo Bajden abviaściŭ režym maštabnaj stychijnaj biady ŭ štacie Kalifornija i zahadaŭ akazać fiederalnuju dapamohu ŭ dadatak da namahańniaŭ miascovych uładaŭ pa adnaŭleńni rajonaŭ, paciarpiełych ad lasnych pažaraŭ.
Bajden taksama adkłaŭ zapłanavany vizit u Italiju, kab zasiarodzicca na akazańni dapamohi ŭ suviazi z pažarami.
Kamientary