Novy kampaktny apraśnialnik nie daść zahinuć ad smahi ŭ mory
Apynucca ŭ adkrytym mory bieź pitnoj vady — scenar, jaki dla mnohich stanovicca sinonimam śmiarotnaj niebiaśpieki. Adnak u Vialikabrytanii znajšli rašeńnie, jakoje daje značnuju kolkaść čystaj vady i zusim nie patrabuje elektraenierhii.
Hipatetyčnaja pierśpiektyva pamierci ad smahi ŭ adkrytym mory vyhladaje žachliva i paradaksalna, asabliva kali vakoł — tolki adna vada. Brytanski startap Hydro Wind Energy zaniaŭsia vyrašeńniem hetaj prablemy i pradstaviŭ uzor novaha partatyŭnaha apraśnialnika QuenchSea 3.0, jaki pieratvaraje salonuju marskuju vadu ŭ čystuju i całkam biaśpiečnuju dla pićcia, paviedamlaje partał New Atlas.
Asnoŭny pryncyp pracy prybora taki — karystalnik rukoj pryvodzić u ruch ryčah, jaki prapuskaje marskuju vadu praz trochuzroŭnievuju sistemu filtracyi i tym samym vydalaje sol, virusy, bakteryi, čaścinki mikrapłastyku i inšyja zabrudžańni. Vada dla ačystki pastupaje praź siłavy šłanh, a ačyščanaja ŭžo vychodzić u kantejnier.
QuenchSea 3.0 moža davać za hadzinu adrazu 6—8 litraŭ pitnoj vady, jakaja adpaviadaje standartam Suśvietnaj arhanizacyi achovy zdaroŭja (SAAZ), što robić apraśnieńnie chutčejšym i mienš stamlalnym dla karystalnika, adznačaje New Atlas.
Hałoŭnaja pieravaha novaha apraśnialnika — jaho niezaležnaść ad źniešnich krynic enierhii i praca vyklučna na ciahličnaj ciazie. Prybor možna brać z saboj u łodki, na kiempinhi ci navat vykarystoŭvać u zonach, dzie niama dostupu da čystaj vady. Takija rašeńni asabliva važnyja ŭ kantekście klimatyčnych źmienaŭ, jakija ŭžo ciapier pryvodziać da niedachopu pitnoj vady ŭ roznych častkach śvietu.
Jak i lubaja technika, QuenchSea 3.0 patrabuje rehularnaha absłuhoŭvańnia. Miembrana zvarotnaha osmasu ŭ pryładzie (vielmi tonki filtr, jaki zatrymlivaje sol, virusy, bakteryi i inšyja drobnyja zabrudžańni, dazvalajučy prachodzić tolki čystaj vadzie) i kartrydžy dla astatnich zvyčajnych filtraŭ raźličanyja na ačystku prykładna 300 litraŭ vady (u zaležnaści ad jaje salonaści i tempieratury), paśla čaho ich treba mianiać.
QuenchSea 3.0 ciapier znachodzicca na stadyi raspracoŭki na kraŭdfandynhavaj płatformie Kickstarter. Jak zajaŭlajuć stvaralniki, kožny, chto zrobić uniosak u pamiery 250 dalaraŭ, atrymaje pa adnoj pryładzie, kali jany vyjduć na rynak.
Płanujecca, što roźničnaja cana adnaho apraśnialnika składzie 500 dalaraŭ, u toj čas jak miembrany zvarotnaha osmasu buduć pradavacca pa 30 dalaraŭ za paru, a filtry — pa 20 dalaraŭ za paru.
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie3
Kamientary