Palitviazień Aŭtuchovič: Kali sa mnoj niešta zdarycca, dyk heta śpiecyjalna
Palitviazień Mikałaj Aŭtuchovič paviedamiŭ, što ciaham 21 dnia byŭ u ŠIZA. Pryčyny pakarańnia Aŭtuchovič nie paviedamiŭ. Jak stała viadoma «Radyjo Svaboda», palitviazień adčuvaje siabie drenna i niepakoicca za žyćcio.
18 listapada asudžany na 25 hadoŭ Mikałaj Aŭtuchovič, jakoha trymajuć u haradzienskaj turmie, vyjšaŭ na suviaź sa svajakami paśla bolš jak miesiaca maŭčańnia. Ad palitviaźnia stała viadoma, što jon adbyŭ 21 dzień u ŠIZA, dzie jamu tolki zredku akazvali miedyčnuju dapamohu, choć jon maje chraničnyja zachvorvańni.
«Razmova pa telefonie była karotkaj. Paśpieŭ skazać, što pačuvajecca «nie vielmi», bo 21 dzień prabyŭ u «sanatoryi». Hetak viaźni tam zavuć ŠIZA. Jašče paśpieŭ skazać, što było vielmi chałodna, tolki ŭ kancy terminu ŭ kamiery adramantavali aciapleńnie. Načami, skazaŭ, uvohule «katastrofa», tak było chałodna», — raskazała krynica sa spasyłkaj na svajakoŭ Mikałaja Aŭtuchoviča.
Pavodle jaje, Mikałaj Aŭtuchoviča skardziŭsia na niedachop miedyčnaj dapamohi.
«Jon chraničny hipiertonik, jamu treba rehularna kantralavać cisk. Ale skazaŭ, što zabrali tanomietr, chacia ŭ jaho byŭ dazvoł na karystańnie. Jašče nierehularna vyklikali da jaho doktara, kali jon prasiŭ dapamohi. Kaža, tolki ŭ adnym ź piaci vypadkaŭ vyklikali. Jak zvyčajna, jon nie šmat kazaŭ pra zdaroŭje, ale hetym razam skazaŭ, što «kali ź im štości zdarycca, dyk heta było zroblena śpiecyjalna».
Pavodle źviestak krynicy, u Mikałaja Aŭtuchoviča puchnuć nohi, taksama palitviazień pakutuje ad chvaroby sustavaŭ.
«Jon źbirajecca skardzicca na ŭtrymańnie ŭ ŠIZA i nieakazańnie miedyčnaj dapamohi», — paviedamiła krynica.
Ciapier čytajuć
Biaspałaŭ namalavaŭ ludziej sa ściahami ŭ centry Minska i adpraviŭ fota ŭ milicyju. Źjechalisia try mašyny ź mihałkami12
Kamientary