Deni Vilnioŭ zajaviŭ, što pačnie zdymać film tolki ŭ 2026 hodzie. Ale fanaty ŭžo ŭ nastupnym miesiacy zmohuć iznoŭ pahruzicca ŭ suśviet Frenka Hierbierta.
Treci film, jaki budzie adaptavać raman Frenka Hierbierta «Miesija Dziuny» 1969 hoda, pakul aficyjna nie anansavany, adnak sam Vilnioŭ aktyŭna jaho abmiarkoŭvaje. U razmovie z Deadline režysior raskazaŭ, što «Poł Atrejdes musić pačać vajnu, kab vyratavać svaich siabroŭ».
Taksama režysior paviedamiŭ, što zdymki trykvieła pačnucca tolki ŭ 2026 hodzie, što aznačaje, što premjera adbudziecca nie raniej za 2027 hod. Raniej płanavałasia, što vytvorčaść startuje ŭ 2025 hodzie, ale pryčynaj pieranosu, mahčyma, źjaŭlajecca ščylny hrafik Ziendei.
Raniej Warner Bros. Pictures i Legendary Entertainment pryznačyli dla nastupnaha filma Vilniova datu 18 śniežnia 2026 hoda. Vierahodna, što da hetaha dnia kamanda nie paśpieje źniać film.
Dziejańni ŭ filmie buduć razhortvacca praz bolš jak dziesiacihodździe kiravańnia Poła Muad'Dziba jak impieratara. Paśla prychodu da ŭłady jon raspačaŭ śviaščenny džychad, jaki pryvioŭ da miljardaŭ achviar pa ŭsioj hałaktycy.
«Miesija» daśleduje asabistyja i palityčnyja kanflikty. Poł sprabuje vypravić nastupstvy vajny, raspačataj ad jaho imia, u toj čas jak jaho atačeńnie pracuje nad tym, kab pazbavić jaho ŭłady.
«Dziuna: Častka 2» stała adnym z samych kasavych filmaŭ 2024 hoda, a režysior Deni Vilnioŭ aktyŭna pracuje nad praciaham. U treciaha filma pakul niama aficyjnaj daty vychadu, ale Vilnioŭ užo zajaviŭ, što paśla jaho pakinie franšyzu.
Što hladzieć u čakańni?
Užo 17 listapada adbudziecca premjera sieryjała «Dziuna: Praroctva» (Dune: Prophecy) ad HBO, jaki źjaŭlajecca prykviełam da kinatryłohii i hruntujecca na ramanie «Orden siaścior Dziuny», napisanym Brajanam Hierbietam, starejšym synam aŭtara aryhinalnaj sieryi ramanaŭ, i Kievinam Džejem Andersanam. Pra jaho my pisali raniej.
Padziei sieryjała adbyvajucca za 10 000 hadoŭ da žyćcia Poła Atrejdesa. Heta čas, kali čałaviectva atrymała kančatkovuju pieramohu nad razumnymi mašynami ŭ tak zvanym «Batleryjanskim džychadzie». Biez mašyn hałaktyka pahruziłasia ŭ technałahičnaje siaredniaviečča, kampiensavać jakoje musiać arhanizacyi, jakija daśledujuć i pašyrajuć miežy čałaviečych mahčymaściej.
Hałoŭnymi hierainiami stanuć siostry tajemnaha žanočaha ordena Bene Heseryt, jakija trenirujuć svaje cieła i rozum da źjaŭleńnia zvyšzdolnaściej, nieadroznych ad mahii, i staviać za hałoŭnuju metu zachavańnie čałaviectva jak vidu.
«Naša Niva» — bastyjon biełaruščyny
PADTRYMAĆJuraś Ziankovič raskazaŭ pra svajo vyzvaleńnie i šlach u ZŠA6
Kamientary