Iranskija chakiery pierasłali kradzienuju infarmacyju sa štaba Trampa ŭ štab Bajdena — FBR
Usio heta adbyvałasia ŭ červieni i lipieni, da taho, jak Bajden źniaŭ svaju kandydaturu na vybarach, i na jaho miesca zastupiła Kamała Charys.
Iranskija chakiery skrali infarmacyju ŭ supracoŭnikaŭ vybarčaha štabu Donalda Trampa i pasłali jaje supracoŭnikam štabu Džo Bajdena. Pra heta ŭ sieradu zajavili FBR i raźviedvalnyja słužby ZŠA, piša Bi-bi-si.
«[Chakiery] z ułasnaj inicyjatyvy pasłali asobam, źviazanym u toj čas z vybarčym štabam prezidenta Bajdena, imejły z vytrymkaj sa skradzienaha nie pryznačanaha dla publiki materyjału sa štaba byłoha prezidenta Trampa», — havorycca ŭ supolnaj zajavie FBR, ofisa dyrektara Nacyjanalnaj raźviedki ZŠA i ŭpraŭleńnia kibierbiaśpieki i biaśpieki infrastruktury ZŠA.
Pa najaŭnych u śpiecsłužbaŭ danych, nichto z supracoŭnikaŭ štaba Bajdena nie adkazaŭ na hetyja listy.
Usio heta adbyvałasia ŭ červieni i lipieni hetaha hoda, da taho, jak Bajden źniaŭ svaju kandydaturu na vybarach, i na jaho miesca zastupiła Kamała Charys.
U zajavie taksama havorycca, što pačynajučy z červienia irancy dasyłali kradzienuju ŭ štaba Trampa infarmacyju amierykanskaj presie.
Aficyjnyja asoby ZŠA jašče ŭ žniŭni zajavili, što Iran pierad listapadaŭskimi vybarami prezidenta sprabuje ŭzmacnić razład u ZŠA i padarvać vieru hramadzian u instytuty dziaržavy. Pavodle tych zajavaŭ amierykanskich uładaŭ, irancy sprabavali atrymać pramy dostup da štaboŭ Respublikanskaj i demakratyčnaj partyj, užyvajučy, u pryvatnaści, mietady «sacyjalnaha inžynirynhu».
Pres-sakratar vybarčaha štaba Donalda Trampa Kerałajn Livit skazała, kamientujučy zajavu FBR i raźviedki, što jano dakazvaje, što Iran choča dapamahčy Kamale Charys i Džo Bajdenu.
«Bo jany viedajuć, što prezident Tramp viernie žorstkija sankcyi i budzie supraćstajać ich teroru», — skazała Livit.
Donald Tramp u 2018 hodzie, budučy prezidentam, vyvieŭ ZŠA z zaklučanaj tryma hadami raniej t.zv. «jadziernaj uhody» z Tehieranam i adnaviŭ amierykanskija sankcyi suprać Irana.
Livit miarkuje, što Bajden i Charys pavinny ŭ ahulnych rysach apisać, što za materyjał byŭ dasłany ich supracoŭnikam
Pres-sakratar vybarčaha štaba Kamały Charys Morhan Finkielštejn zapeŭnivaje, što štab supracoŭničaŭ z pravaachoŭnymi orhanami z taho samaha momantu, jak daviedaŭsia pra ŭzłom.
«Nam nie viadoma pra jaki-niebudź materyjał, dasłany naŭprost štabu. Niešta, jakoje vyhladała jak spam abo sproba fišynhu, było dasłana na asabistyja imejły niekalkim asobam», — skazała Finkielštejn.
Aficyjny pradstaŭnik misii Irana ŭ AAN, adkazvajučy na pytańnie amierykanskaj telekampanii CBS ab zajavie FBR i raźviedak, zajaviŭ: «Iran nie maje ni matyvaŭ, ni namieru ŭmiešvacca ŭ vybary ŭ ZŠA i kateharyčna adchilaje padobnyja abvinavačvańni».
Ciapier čytajuć
Polšča nie adkryje miažu i paśla skančeńnia vučeńniaŭ «Zachad»55
Kamientary