Zirnicie, jak schudnieŭ były dziaržsakratar ZŠA Majk Pampiea. Voś jak heta było

Paśla vychodu ŭ adstaŭku Majk Pampiea nie tak časta pajaŭlajecca na publicy. Ale na dniach jon sustreŭsia z prezidentam Ukrainy Uładzimiram Zialenskim. Adpaviednaje videa źjaviłasia ŭ aficyjnym telehram-kanale apošniaha.

Kab nie kamientaryj Zialenskaha, to mała chto zmoh by paznać u mužčynie, na jakim trochi mieškavata siadzić harnitur, byłoha «važkaha» jak u litaralnym, tak i ŭ pieranosnym sensie słova palityka.

Što zdaryłasia?

Jak raskazvaŭ sam palityk vydańniu The New York Post, vahu jon staŭ nabirać u 2010 hodzie, kali byŭ abrany ŭ Kanhres ZŠA. Za nastupnyja 10-11 hadoŭ, pa słovach mužčyny, jon nabraŭ amal sto funtaŭ (kala 45 kiłahramaŭ). Na situacyju paŭpłyvała i traŭma nahi.

Rašeńnie ab zmahańni ź lišniaj vahoju Pampiea pryniaŭ u červieni 2021 hoda, kali ŭbačyŭ staŭšy na vahi, što jamu zastałosia vielmi mała da 300 funtaŭ (prykładna 136 kiłahramaŭ).

«Ja pačaŭ zajmacca sportam, nie kožny dzień, ale amal što kožny i pravilna jeści, i vaha prosta pačała spadać», — raskazvaŭ Pampiea.

Pa słovach byłoha dyrektara CRU i dziaržsakratara ZŠA, jon kupiŭ damoŭ trenažory i imknuŭsia zajmacca piać-šeść razoŭ na tydzień pa paŭhadziny. Pampiea taksama rezka źmienšyŭ kolkaść vuhlavodaŭ u racyjonie i ŭvohule staŭ jeści mienš.

Pry hetym jon nie źviartaŭsia za kansultacyjami ni da treniera, ni da dyjetołaha. Hałoŭnaj u pracesie pachudańnia, pa słovach Pampiea, była siła voli.

U presie, praŭda, vykazvałasia mierkavańnie, što matyvam da zmahańnia ź lišniaj vahoju mahło stać rašeńnie palityka vystavić svaju kandydaturu na prezidenckich vybarach 2024 hoda. Ab takich płanach jon zajaŭlaŭ telekanału Fox News u sakaviku 2021 hoda, ale ŭ krasaviku 2023 hoda pieradumaŭ.

U pačatku 2022 hoda Pampiea pachvaliŭsia, što zmoh skinuć 90 funtaŭ (41 kh) za šeść miesiacaŭ tolki dziakujučy samastojnym zaniatkam i źmienaj charčavańnia. Adnak niekatoryja dyjetołahi i śpiecyjalisty pa fitnesie skieptyčna adnieślisia da takich zajaŭ mužčyny.

Vydańnie The Guardian vykazała sumnievy ŭ praŭdzivaści historyi ab pachudzieńni. Žurnalisty źviartali ŭvahu, što Pampiea paroju rabiŭ palityčnyja zajavy, jakija ŭvodzili ŭ zman, tamu nie varta daviarać i jaho raskazam ab baraćbie ź lišniaj vahoju.

Majk Pampiea, nahadajem, byŭ adnym ź niešmatlikich zachodnich palitykaŭ, jakija sustrakalisia z Alaksandram Łukašenkam. Jon prylataŭ u Minsk — u pačatku 2020 hoda.

Pavialičyć

Tady jon zajaviŭ, što ZŠA nie patrabujuć ad Biełarusi vybirać miž Rasijaj i Zachadam. Jon taksama skazaŭ, što prahres Biełarusi ŭ pytańniach pravoŭ čałavieka, svabody presy i ŭzmacnieńnia roli hramadzianskaj supolnaści — adziny varyjant dla poŭnaha źniaćcia sankcyj. U Minsku jon sustreŭsia nie tolki z Łukašenkam, ale i z pradstaŭnikami hramadzianskaj supolnaści, siarod jakich byŭ budučy nobieleŭski łaŭreat Aleś Bialacki, i naviedaŭ Park vysokich technałohij, pra jaki vielmi vysoka adhuknuŭsia.

Da pasady kiraŭnika dypłamatyčnaha viedamstva ZŠA Pampiea ŭznačalvaŭ Centralnaje raźviedvalnaje ŭpraŭleńnie — na abiedźvie pasady jaho pryznačyŭ Donald Tramp u čas svajho prezidenctva. Ciapier 60-hadovy Pampiea ličycca adnym z hałoŭnym zamiežnapalityčnych daradcaŭ Trampa. 

• 17
• 1
• 1
• 1
• 2
• 0
• 0
• 0