Da kanca 2024 hoda ŭ Biełarusi pamianiajuć sistemu rehulavańnia cen
Pra toje, što ŭ Biełarusi da kanca 2024-ha raspracujuć novuju sistemu cenavaha rehulavańnia, paviedamiŭ na mižnarodnym forumie «Trejd dyjałoh» ministr antymanapolnaha rehulavańnia i handlu Alaksiej Bahdanaŭ, piša BiełTA.
Bahdanaŭ źviarnuŭ uvahu na toje, što sistema cenavaha rehulavańnia, uviedzienaja ŭ kancy 2022 hoda, pastajanna patrabuje transfarmacyi i raźvićcia. Pry hetym jon adznačyŭ, što ŭ ekanomicy Biełarusi ŭsio pastajanna mianiajecca, adčuvajecca ŭpłyŭ źniešnich faktaraŭ, i ŭłady pavinny apieratyŭna reahavać na źmienlivuju ekanamičnuju situacyju.
Tamu ŭžo ciapier idzie raspracoŭka karekcirovak u pastanovu Saŭmina ab cenavym rehulavańni (№713). Pry hetym MARH prapanuje ŭnieści źmianieńni ŭ najbližejšy čas.
Pakul, adnak, heta buduć nievialikija techničnyja źmieny, ale ŭ cełym staić zadača na 2025 hod raspracavać peŭny dakumient, jaki zabiaśpiečvaje «spraviadlivaje cenaŭtvareńnie ŭ intaresach dziaržavy i naroda».
«Da kanca hoda treba vypracavać novuju sistemu cenavaha rehulavańnia, jakaja dazvolić zabiaśpiečyć, mahčyma, biez takich žorstkich mieraŭ, zachavańnie tych ža pryncypaŭ spraviadlivaha cenaŭtvareńnia, jak i siońnia», — adznačyŭ ministr.
Alaksiej Bahdanaŭ rastłumačyŭ, što ŭradavaja pastanova zakranaje ŭsich udzielnikaŭ handlovaha pracesu: ad vytvorcaŭ i imparcioraŭ da roźničnaha źviana. Pry hetym najbolš strohaje rehulavańnie atrymała handlovaje źviano ŭ vyhladzie hraničnych nadbavak. A voś u vytvorcy jość mahčymaść pavysić ceny na tavary pry ŭzhadnieńni ź dziaržorhanami i najaŭnaści ekanamičnaha abhruntavańnia.
Bahdanaŭ śćviardžaje, što pastanova Saŭmina №713 dasiahnuła mety, pastaŭlenaj Łukašenkam, kali zabiaśpiečana cenavaje rehulavańnie i vykonvajucca paramietry pa inflacyi.
«Nasielnictva i biznes heta razumiejuć. U cełym my bačym pa rentabielnaści vytvorcaŭ i handlu, što «tłušč zrezali», ale praca idzie», — padkreśliŭ čynoŭnik.
Taksama jon paviedamiŭ pra źnižeńnie kolkaści stratnych arhanizacyj handlu ŭ pieršym paŭhodździ 2024-ha.
Kamientary