Maršałak polskaha Siejma: Kali Łukašenku treba tranzitnyja kalidory, jon musić vyzvalić palitviaźniaŭ
Polšča praciahvaje cisk na režym Łukašenki dla vyzvaleńnia Andžeja Pačobuta i inšych palitviaźniaŭ u Biełarusi, skazaŭ maršałak polskaha Siejma Šyman Hałoŭnia na kanfierencyi ŭ pytańniach biaśpieki GLOBSEC, jakaja pačałasia 30 žniŭnia ŭ Prazie.
«Na dypłamatyčnym uzroŭni my robim usio mahčymaje, kab pasłać Łukašenku sihnały, što jon musić vyzvalić palitviaźniaŭ, — skazaŭ Hałoŭnia, adkazvajučy na pytańnie Radyjo Svaboda. — Što kali jon choča adkryćcia pamiežnych pierachodaŭ, kali jon choča mieć tranzitnyja kalidory, jamu treba supracoŭničać z nami ŭ hetym pytańni. My sprabujem pakazać, što kali jon nie budzie supracoŭničać, dyk nastupstvy dla jaho, dla jahonaha režymu i dla jahonaj krainy buduć sapraŭdy składanymi».
Hałoŭnia nazvaŭ «histaryčnym» niadaŭni vizit premjer-ministra Indyi Narendry Modzi ŭ Polšču i Ukrainu. Pavodle polskaha palityka, «heta byŭ značny sihnał nia tolki dla Rasii, ale i dla Łukašenki».
Maršałak polskaha Siejma taksama adznačyŭ, što mihracyjny cisk na polskuju miažu z boku Biełarusi istotna źniziŭsia paraŭnalna z tym, što było niekalki miesiacaŭ tamu ci hod tamu. Pavodle jaho, heta adbyłosia dziakujučy krokam polskaha ŭradu.
Pry hetym Hałoŭnia pryznaŭ, što polskija palityki časam nia viedajuć, «na jakija knopki varta naciskać, kab aktyvavać pracesy ŭ Biełarusi».
«Łukašenka pieratvaryŭ Biełaruś — horduju niezaležnuju krainu — praktyčna ŭ kałoniju Rasii. Ale my časam nie viedajem, jakija ich uzajemaadnosiny i jaki ŭzrovień uzajemnaj nianaviści, zajzdraści i ahresii isnuje pamiž [Łukašenkam i prezidentam Rasii Uładzimiram Pucinym]», — skazaŭ jon.
Kamientary
Kali niepatrebny - chaj sabie siadziać ?