Ukrainskamu aliharchu Iharu Kałamojskamu vystavili padazreńnie ŭ arhanizacyi zakaznoha zabojstva. A heta pažyćciovaje

Aliharchu Iharu Kałamojskamu paviedamili ab padazreńni ŭ arhanizacyi zakaznoha zabojstva dyrektara adnoj ź jurydyčnych kampanij, paviedamlaje «Ukrainskaja praŭda».

«Pry pracesualnym kiraŭnictvie ofisa hienieralnaha prakurora viadomamu biznesoŭcu [Iharu Kałamojskamu], padazravanamu ŭ lehalizacyi majomaści, atrymanaj ašukanskim šlacham, paviedamlena ab padazreńni va ŭčynieńni jašče adnaho złačynstva, źviazanaha z arhanizacyjaj zakaznoha zabojstva (č.4 art. 27, č. 2 art. 15, p. p. 11, 12, č. 2 art. 115 KK)».

Pa danych śledstva, aliharch, kab adpomścić, zamoviŭ zabojstva dyrektara adnoj ź jurydyčnych kampanij za «nievykanańnie patrabavańniaŭ pa anulavańni i pryznańnie niesapraŭdnymi rašeńniaŭ ahulnaha schodu akcyjanieraŭ adkrytaha akcyjaniernaha tavarystva».

U palicyi śćviardžajuć, što Kałamojski mieŭ asabisty kamiercyjny intares u pracy mietałurhičnaha zavoda, a rašeńnie ahulnaha schodu akcyjanieraŭ pradpryjemstva nie dazvalała jamu paŭnavartasna realizavać svoj płan nažyvy.

Tamu jon z pahrozami źviarnuŭsia da advakata jurydyčnaj firmy, jakaja ŭdzielničała ŭ ahulnym zbory akcyjanieraŭ i rychtavała jurydyčnuju dakumientacyju, kab toj admianiŭ rašeńnie. U adkaz aliharch atrymaŭ admovu, tamu vyrašyŭ adpomścić.

Dla vykanańnia zamovy Kałamojski praz svajho achoŭnika pryciahnuŭ členaŭ bandy, jakaja «śpiecyjalizavałasia» na fizičnaj raspravie z kankurentami.

Pavodle infarmacyi Nacpalicyi, napad adbyŭsia ŭ žniŭni 2003 hoda ŭ centry Fieadosii.

Tady čaćviora mužčyn nanieśli paciarpiełamu ŭdary mietaličnym dubcom pa hałavie i nažavyja ranieńni ŭ hrudzi, žyvot i śpinu. Pieraškodziła złamyśnikam dabić muža žonka paciarpiełaha, a lekaram udałosia vyratavać jaho žyćcio.

Praź niekalki dzion vykanaŭcaŭ złačynstva zatrymali, a paźniej prysudzili da pazbaŭleńnia voli na terminy ad 6 da 12 hadoŭ.

Rasśledavańnie ŭstanaŭleńnia zakazčyka zabojstva było vydzielena ŭ asobnuju vytvorčaść. I tolki 8 maja 2024 hoda Kałamojskamu było abvieščana ab padazreńni.

Za zamach na naŭmysnaje zabojstva, ździejśnienaje pa zamovie pa papiaredniaj zmovie hrupaj asob praduhledžana pakarańnie ŭ vyhladzie pazbaŭleńnia voli na termin da 15 hadoŭ abo pažyćciovaje pazbaŭleńnie voli.

Taksama ŭ čatyroch rehijonach Ukrainy pravodziacca 23 pieratrusy ŭ ramkach hetaj vytvorčaści.

Kałamojski ŭžo znachodzicca pad vartaj praź inšuju spravu.

• 4
• 0
• 1
• 0
• 2
• 0
• 0
• 0