Palitkarektnaść znoŭ u modzie. Hod paśla taho, jak u budynku Jeŭraparłamienta, u Bruseli, u honar staršynioŭstva Čechii ŭstalavali skulpturna-hrafičnuju kampazicyju Davida Černaha, jakaja adnym zasabam zdoleła abrazić bolšaść krainaŭ Jeŭropy, sioletniaja skulptura — užo ŭ honar ispanskaha staršynioŭstva, — uzor vytrymanaści i niejtralnaści. Instalacyja ispanskaha mastaka Danieła Kanahara, jakaja maje nazvu Travesias («Skryžavańni»), ujaŭlaje saboj videaekran u formie pakručastaj 30-mietrovaj stužki, na jakim milhaciać čałaviečyja postaci i tvary.
Letaś usio było bolš strakata. Nahadajem: tady ŭ budynku jeŭraparłamienta ŭstalavali mastackuju kampazicyju, jakuju kuryravaŭ češski mastak David Černy. U stvareńni kampazicyi ŭziała ŭdzieł 27 mastakoŭ z 27 krainaŭ: jany zrabili instalacyi, karykatury, skulptury pra toje, jak ich krainy časta — i pamyłkova — ujaŭlajuć zamiežniki. Choć meta Černaha była vyśmiejać stereatypy, ale ž tvor mastactva vyklikaŭ najpierš abureńnie.
Naprykład Polšča — jakuju časta malujuć jak samuju kansiervatyŭnuju krainu ES — była «pradstaŭlenaja» ŭ kampazicyi karykaturaj, na jakoj ksiandzy i manaški ŭstaloŭvali viasiołkavy ściah hiej-ruchu. Bałharyja była vyjaŭlenaja ŭ vyhladzie vialikaha ŭnitaza (namiok na pieravałačny punkt dla susiedniaj Turcyi). A Brytanija dyk zusim adsutničała (brytancy, maŭlaŭ, jeŭraintehracyi nie radyja). I hetak dalej u toj ža maniery: Černy prymudryŭsia abrazić navat nie-siabra Jeŭrasajuza, Respubliku Biełaruś. Na karykatury, jakaja ŭvasablała Litvu, piać advažnych vajskoŭcaŭ sikali praź dziaržaŭnuju miažu na ŭschod (to bok pavodle ŭsich mapaŭ na terytoryju RB).
Razhareŭsia skandał. Choć biełarusy i litoŭcy ŭ sud nie padali, a voś bałharskija pradstaŭniki ŭ Bruseli vykazali publičnaje abureńnie, i navat chacieli paskardzicca ŭ mižnarodny sud za ačernieńnie nacyjanalnaha honaru.
Sioleta ž jeŭraŭłady vyrašyli nie ekśpierymientavać – prajekt instalacyi ŭzhadniaŭsia zahadzia: jak paviedamlaje navinovaje ahienctva «Rejter» prysutnyja na adkryćci mastackaj instalacyi jeŭračynoŭniki navat pachvalili mastaka, adznačyŭšy, što toj svajoj skulpturaj nie spravakavaŭ «nijakaha dypłamatyčnaha skandału», i nazvali jaho videastžku «cikavym tvoram».
Ciapier čytajuć
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ109
Kamientary