Sioleta žuravy, jak i, naprykład, dzikija husi, prybyli ŭ Biełaruś značna raniej za zvyčajny termin. Zvyčajna rannija vizity fiksujucca nie raniej za siaredzinu sakavika, a sioleta žuravy prylacieli ŭzimku, piša vydańnie «Smartpres».
«Viasna vyrašyła pryjści raniej zapłanavanaha — siońnia dniom, 24 lutaha, zrabiła pieršyja kadry žuravoŭ, jakija viarnulisia ź ciopłych krajoŭ. Padrychtavacca da takoha składana — pieršyja sustrečy ź pieralotnymi ptuškami zaŭsiody niečakanyja», — dzielicca ŭražańniami naziralnica i fatohrafka dzikaj pryrody Ina Škurko.
Jana zaŭvažyła vysoka ŭ niebie bujnych ptušak padčas padarožža pa Lepielskim rajonie. Žuravy pralacieli prosta nad hałavoj žančyny.
«Padniesła binokl — i nie pavieryła svaim vačam: u moj bok lacieli žuravy. Davoli chutka pačuła ich kurłykańnie — pieršaje vydatnaje kurłykańnie ŭ hetym hodzie!» — kaža Ina Škurko.
Pry hetym jana paśpieła zafiksavać čaradu na kamieru, zrabiŭšy niekalki kadraŭ.
Kamientujučy fota Iny Škurko, zaołah Vital Kaščejeŭ adznačyŭ: na Miorščynie i Brasłaŭščynie pieršych žuravoŭ nazirali jašče raniej — 13 i 14 lutaha.
U zvyčajnyja hady žuravy viartajucca ŭ Biełaruś u kancy sakavika — pačatku krasavika. Ale kali kaniec zimy adznačany adlihami i viasna prychodzić rana, to ptuški źjaŭlajucca ŭ siaredzinie sakavika. A za sioletni zusim rańni vizit zastajecca dziakavać tolki paciapleńniu klimatu.
Ličycca, što ptuški, jakija laciać na poŭnač, padarožničajuć vialikimi čarodami, «miascovyja» žuravy prylatajuć na znajomyja im hniozdy parami. Zaniaŭšy hniezdavy ŭčastak, ptuški paviedamlajuć pra svajo źjaŭleńnie hučnym trubnym kurłykańniem, jakoje žuravy vydajuć jak u palocie, tak i na ziamli. Kali para vyrašaje zaniać hniazdo, možna čuć «duet» samca i samki.
Kiraŭnik Lidy zaklikaŭ siłavikoŭ nie spyniać palityčnych represij28
Kamientary