«Uklučyŭ nie tuju pieśniu — čakaj «haściej». U restaranach Bresta zabaroniena vykonvać Siardziučku, «#2Mašy», «Mumij Trola» i jašče 84 artystaŭ
Jaki ž Novy hod bieź Siardziučki? Jak nie praśpiavać «Biez boju» hurta «Akijan Elzy»? Adnak u bresckich karaokie-restaranach ciapier «saliruje» ideałohija.
Napiaredadni Novaha hoda i Kaladaŭ pryniata składać viš-listy (śpis pradmietaŭ, jakija chto-niebudź žadaje nabyć abo atrymać u jakaści padarunka). Ale ŭ Biełarusi, z-za taho, što ŭłada pačuvajecca niebiaśpiečna, čynoŭniki i ideołahi składajuć stop-listy. U pryvatnaści — śpisy zabaronienych da vykanańnia i prajhravańnia muzyčnych kampazicyj u publičnych miescach, piša BG media.
Čałaviek, znajomy z restarannym mieniedžmientam, raspavioŭ, što z hetaha hoda ŭ Breście praviły hulni ŭ hetaj śfiery mocna pastrožylisia.
Ciapier kožny zaprošany artyst pavinien być zarehistravany ŭ vykankamie i za jaho pavinien być zapłačany padatak. Akramia taho, čakajecca asablivy kantrol z boku padatkavych słužbaŭ.
Plus da ŭsiaho — usia prahrama, jakaja prapanujecca haściam ustanovy, pavinna prajści «cenzuru» ŭ vykankamie. Tamu, pa słovach surazmoŭcy, zaprošanych artystaŭ na navahodnich śviatkavańniach budzie značna mienš.
I heta jašče nie ŭsio: akramia pieradnavahodnich pravierak supracoŭnikami MNS i milicyi prachodziać i ideałahičnyja pravierki. U pieršuju čarhu takija pravierki datyčacca muzyčnaha repiertuaru, jaki vykarystoŭvajecca na śviatočnych mierapryjemstvach.
«Usia kulturna-zabaŭlalnaja prahrama prachodzić uzhadnieńnie praz harvykankam. U pieršuju čarhu tyčycca heta muzyčnaha napaŭnieńnia.
Jość tak zvany «čorny śpis z artystaŭ i muzyčnych kampazicyj, jakija nielha vykarystoŭvać. Nielha ni na dyskatekach, ni ŭ karaokie-kłubach», — raspavioŭ čałaviek, jaki pracuje ŭ restarannym biznesie.
Jakija mohuć być nastupstvy, kali raptam praviarajučy pačuje abo zrazumieje, što va ŭstanovie ŭklučyli «zabaronku», surazmoŭca pakul nie ŭ kursie: «chutčej za ŭsio buduć užytyja sankcyi da restarana, ci ž «paprosiać» zvolnić supracoŭnika, jaki niasie adkaznaść za muzyčnaje supravadžeńnie mierapryjemstva».
Tyčycca zabarona nie tolki bresckich restaranaŭ i publičnych miescaŭ, ale i rehijanalnych. Da prykładu, u adnym z rajonnych centraŭ adździeł ideałohii rajvykankama paprasiŭ kiraŭnictva ŭstanovy padać u drukavanym vyhladzie śpis muzyčnych kampazicyj, jakija majucca ŭ karaokie-katałohu. Baza vielizarnaja, lik idzie na dziasiatak tysiač piesień, tamu dla razdrukoŭki jaje spatrebicca ceły błok papiery.
Što zabaroniena i što śpiavajuć u bresckich karaokie
«Ciapier my nie možam vykarystoŭvać ukrainskamoŭnyja pieśni, kampazicyi ŭ vykanańni Valeryja Mieładze, pieśni napisanyja Kanstancinam Mieładze, hrupy «Źviery»…
Śpis dosyć vialiki, bo zabaronienyja amal usie, kali nie skazać što ŭsie artysty z Ukrainy. A ich u ruskamoŭnaj muzyčnaj industryi było šmat. Jaki ž Novy hod bieź Siardziučki? Jak ža nie praśpiavać «Biez boju» ŭkrainskaha hurta «Akijan Elzy»?, — raspaviadaje ekśpiert.
Akramia vyšejzhadanych artystaŭ, pad zabaronaj taksama pieśni hurtoŭ «#2Mašy», «Bi-2», DDT, «Mumij Trol», «Pornafilmy», «Niervy», «Little Big» i inšyja.
Naturalna, u śpisie jość biełaruskija hurty: «Naviband», «Krambambula», «Lapis Trubiacki», «Tiani-Tołkaj», «Leprykonsy», «Litesound».
«Kali raniej aktyŭna śpiavali Manacika, Ziemfiru, Łabadu, to ciapier my kažam, što piesień takich artystaŭ niama ŭ našaj bazie. Što tyčycca topavaha repiertuaru ciapier, to ŭ bresckich restaranach śpiavajuć Lepsa, Alehravu, «Batarejku» hurta «Žuki», — raspavioŭ naš surazmoŭca.
Jon taksama padzialiŭsia svaimi aściarohami z nahody dalejšaha raźvićcia situacyi z repiertuarnymi zabaronami:
«U pieršuju čarhu, u hetaj situacyi varta bajacca nie praviaralščykaŭ-ideołahaŭ, a tych ludziej, ź jakimi pracuješ pobač. Bo ŭłady na heta i rabili raźlik, kab biełarusy aktyŭna «stukali» adzin na adnaho. Uklučyŭ nie tuju pieśniu — čakaj «haściej» u čornym».
Ciapier čytajuć
Aryštavany viadomy nieŭrołah Rusłan Badamšyn. Jon byŭ na chatniaj chimii6
Kamientary