Ad pnieŭmanii ŭ Śvietłahorsku pamierli čatyry čałavieki, amal 200 znachodziacca na lačeńni
Z pačatku epidemičnaha padjomu ad pnieŭmanii ŭ Śvietłahorsku pamierli čatyry čałavieki, amal 200 znachodziacca na lačeńni. 118 čałaviek z dyjahnazam «pnieŭmanija» prajšli lačeńnie i vypisanyja sa stacyjanara.
Takija źviestki pryvodzić u intervju śvietłahorskaj haziecie «Ranak-plus» namieśnik hałoŭnaha lekara pa lačebnaj častcy Śvietłahorskaj centralnaj rajonnaj balnicy Ihar Cichun. Intervju ź lekaram było apublikavana 9 śniežnia. Infarmacyju pra kolkaść zachvarełych na pnieŭmaniju paćvierdziŭ hałoŭny ŭrač Śvietłahorskaj centralnaj rajonnaj balnicy Anatol Mucha. Razam z tym jon admoviŭsia nazvać kolkaść pamierłych ad zachvorvańnia.
«Zvyčajny, zdavałasia b, hryp, ničoha asablivaha ŭ im niama — i voś taki ŭsplosk pnieŭmanij,—
prakamientavaŭ u intervju haziecie Cichun. — Heta ŭskładnieńnie virusnaj infiekcyi. Takoje byvaje paśla siezonnych hrypaŭ, ale, kaniečnie, nie ŭ takoj kolkaści.
Heta prosta nievytłumačalna.
Jak i va ŭsioj krainie, u nas zafiksavanyja vypadki pnieŭmanii siaredniaj stupieni ciažkaści, ciažkija i vielmi ciažkija. Ź vielmi ciažkimi formami pnieŭmanii było kala 10 čałaviek. Čatyry pacyjenty pamierli. Uskryćcio paćvierdziła najaŭnaść u ich virusnaj pnieŭmanii».
Pavodle słoŭ doktara, achviary pnieŭmanii byli va ŭzroście 25—40 hadoŭ, jakija nie pakutavali ad spadarožnych patałohij.
Zaraz u stacyjanary znachodziacca na lačeńni ludzi roznych uzrostaŭ, ale bolšaść — pracazdolnaha.
Rajonnaja hazieta «Śvietłahorskija naviny» pryvodzić infarmacyju zahadčyka epidemičnym adździełam zanalnaha centra hihijeny, epidemijałohii i hramadskaha zdaroŭja Śviatłany Jakuš pra toje,
što za listapad VRVI pierachvareli 7.999 žycharoŭ Śvietłahorska i rajona, hryp pieranieśli 2.817 čałaviek. Na 7 śniežnia ŭ Śvietłahorskim rajonie zarehistravana try łabaratorna paćvierdžanyja vypadki virusa A/H1N1.
Achviarami virusa stali 25-hadovaja ciažarnaja žančyna i mužčyny 1966 i 1951 hadoŭ naradžeńnia.
Pavodle paviedamleńnia pres-słužby Homielskaha abłvykankama, u vobłaści za pieryjad epidemičnaha padjomu zachvorvańnia na hryp i VRI na pnieŭmaniju zachvareła amal 6.700 čałaviek.
Kamientary