Raniej mierkavałasia, što Kreŭski zamak maje ŭ płanie trapiecyju ź dźviuma viežami pa vuhłach. Niekalki dzion tamu padčas archieałahičnych raskopak znajšli padmurak treciaj viežy, piša Reform.by.
Kiraŭnik raskopak kandydat histaryčnych navuk archieołah Aleh Dziarnovič paviedamiŭ, što heta vielmi važnaje adkryćcio i dla historyi Kreŭskaha zamka, i dla historyi daśledavańniaŭ pačatku muravanaha abarončaha dojlidstva Vialikaha Kniastva Litoŭskaha.
Minuły archieałahičny siezon dazvoliŭ łakalizavać małuju bramu z unutryviežavym leśvičnym tunelem u joj, znachodki važnyja dla rekanstrukcyi vialikaj bramy.
Ciapier na rohu zamka byŭ raskapany vializny padmurak, šyrynioj pad dva mietry (192—194 sm). Taksama z dapamohaj polskich kaleh udałosia padniać materyjały polskaha mižvajennaha abśledavańnia, i na ich taksama abaznačany reštki tych pabudoŭ, jakija siońnia možna interpretavać jak viežu, paviedamiŭ historyk.
U tym ža vuhle mahła być i treciaja brama, tamu zamak u hetym miescy najbolš zrujnavany, mahčyma, mienavita tut vojski kniazia Śvidryhajły ŭ 1433 hodzie, padčas dynastyčnaj baraćby, prarvalisia ŭnutr. Vieža była paškodžanaja i bolš nie adnaŭlałasia.
Struktura Kreŭskaha zamka była bolš składanaj, razhalinavanaj i bolš funkcyjanalna nasyčanaj, zrabiŭ vysnovu Aleh Dziarnovič.
Nahadajem, što ciapier adbyvajecca kansiervacyja, restaŭracyja i archieałahičnyja daśledavańni Kreŭskaha zamka, unikalnaha pomnika abarončaha dojlidstva pačatku XIV stahodździa (pavodle inšych mierkavańniaŭ — kanca XIII stahodździa). U Kreŭskim zamku raźmiaščałasia rezidencyja vialikich kniazioŭ.
Ciapier čytajuć
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych1818
Kamientary