U Salihorsku vystraiłasia vialikaja čarha, kab dapamahčy čałavieku adužać lejkiemiju
Žycharoŭ Salihorska zaklikali pryjści ranicaj u paniadziełak, 24 lipienia na stancyju pieralivańnia kryvi dla zaboru kryvi, kab dapamahčy žycharu horada Viktaru Vuhłovu, jaki chvory na lejkiemiju. Adhuknulisia sotni ludziej, paviedamlajuć na instahram-staroncy «Tvoj Salihorsk».
Spačatku ad 8:00 da 10:00 pavinny byli pryniać tolki 200 čałaviek. Ale pryjom vyrašyli padoŭžyć da 13:00 i ŭziać bolš uzoraŭ kryvi. Pavodle źviestak «Biełaruśkalija», da 10:00 paśpieli zdać kroŭ bolš za 200 čałaviek.
«Šaniec, što niečaja kroŭ padydzie, nievialiki. Ale ŭsich donaraŭ unosiać u bazu i ŭ budučyni jany zmohuć vyratavać niečaje žyćcio», — adznačaje «Tvoj Salihorsk».
Viktaru Vuhłovu 29 hadoŭ, jon žanaty i vychoŭvaje trochhadovuju dačku, pracuje na «Biełaruśkalii». Što jamu patrebna dapamoha, stała viadoma 20 lipienia. Mužčyna doŭha lačyŭsia, i chimijaterapija vyvieła chvarobu ŭ remisiju, ale na niepraciahły čas. Ciapier jamu patrabujecca pierasadka hiemapaetyčnych kletak — taksama jany nazyvajucca hiemacytabłasty. Heta samyja rannija papiaredniki kletak kryvi, jakija dajuć pačatak usim astatnim kryvianym kletkam i znachodziacca ŭ asnoŭnym u kaściavym mozhu.
«Adnak vierahodnaść znachodžańnia sumiaščalnaha niarodnasnaha donara vielmi nizkaja. I tamu vielmi važna, kab nacyjanalny rejestr takich donaraŭ byŭ maksimalnym. Na siońnia jon niešmatliki», — adznačaje «Tvoj Salihorsk».
Kab stać mahčymym donaram hiemapaetyčnych stvałavych kletak, treba było zapoŭnić ankietu i pahadnieńnie ab uniasieńni svaich danych u bazu, a taksama zdać 10 mł pieryfieryčnaj kryvi dla analizu. Kali chtości z saliharčan padydzie, to zdać treba budzie ŭžo 500 mł kryvi.
Patencyjnym donaram hiemapaetyčnych stvałavych kletak moža stać luby čałaviek ad 18 da 50 hadoŭ.
Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa55
Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5555
Kamientary