«Važna, kab praces byŭ zapuščany». Viačorka — pra vydaču ordara na aryšt Łukašenki
Źmiest novaj spravazdačy Viarchoŭnaha kamisara AAN pa pravach čałavieka śviedčyć ab pryznańni na ŭzroŭni Arhanizacyi prykmiet złačynstvaŭ suprać čałaviečnaści ŭ Biełarusi.
Takoje mierkavańnie vykazaŭ BPN staršy daradca demakratyčnaj lidarki Śviatłany Cichanoŭskaj Franak Viačorka, paviedamlaje «Radyjo Svaboda».
«Heta značyć, ad rasśledavańnia i zboru danych možna pierachodzić da stvareńnia miechanizmu pryciahnieńnia da adkaznaści, — skazaŭ jon. — Struktury AAN mohuć na heta paŭpłyvać, heta moža być zroblena praź isnujučyja mižnarodnyja sudy, a moža być stvorany novy miechanizm».
«U minułym i pazaminułym hodzie takich dokazaŭ i śviedčańniaŭ na aficyjnym uzroŭni AAN nie było», — padkreśliŭ palityk.
Na jaho dumku, materyjały spravazdačy taksama važnyja ŭ kantekście pryniataha napiaredadni rašeńnia Mižnarodnaha kryminalnaha suda ab vydačy ordara na aryšt prezidenta RF Uładzimira Pucina.
Viačorka dapuściŭ, što padobnyja dziejańni simvaličnyja, pakolki Rasija nie pryznaje jurysdykcyju hetaha suda, a Pucina «naŭrad ci mohuć aryštavać». «Ale taho samaha my pavinny dabivacca da ŭsich złačyncaŭ, źviazanych z katavańniami na Akreścina, z masavym źbićciom demanstrantaŭ u 2020 hodzie, i ŭ dačynieńni da Łukašenki», — ličyć daradca Cichanoŭskaj.
«My nie havorym, što heta budzie siońnia ci zaŭtra. Heta ŭsio zojmie čas, uličvajučy ŭsie asablivaści mižnarodnych instytutaŭ i ich biurakratyju. Ale tut ža važna, kab byŭ zapuščany praces», — dadaŭ jon.
Demsiły, pavodle słoŭ Viačorki, pracujuć nad stratehijaj pryciahnieńnia režymu Łukašenki da adkaznaści — «kab pahladzieć, jakija miechanizmy relevantnyja i mohuć być skarystanyja, a jakija nie».
Situacyja ŭskładniajecca tym, što Minsk nie ŭstupiŭ u šerah mižnarodnych pahadnieńniaŭ, jakija praduhledžvajuć mahčymaść takoj adkaznaści, reziumavaŭ Viačorka.
U Biełarusi nazirajecca «nieprymalnaja karcina biespakaranaści i amal poŭnaha źniščeńnia hramadzianskaj supolnaści i asnoŭnych svabod», havorycca ŭ apublikavanaj 17 sakavika spravazdačy Viarchoŭnaha kamisara AAN pa pravach čałavieka Folkiera Ciurka.
Dakład zasnavany na intervju z 207 paciarpiełymi ad dziejańniaŭ siłavikoŭ i śviedkami, analizie bolš za 2,5 tys. dokazaŭ, u tym liku fatahrafij, videa, miedycynskich i sudovych pratakołaŭ, i achoplivaje pieryjad z 1 maja 2020 pa 31 śniežnia 2022 hoda. Dakumient źjaŭlajecca praciaham raniej apublikavanaha dakłada AAN, jaki achoplivaje padziei vyklučna žniŭnia 2020 hoda ŭ Biełarusi.
U dakładzie źmiaščajecca zaklik da dziaržaŭ-členaŭ AAN razhledzieć pytańnie ab pryciahnieńni da adkaznaści praz nacyjanalnyja razbory na padstavie ahulnapryniatych pryncypaŭ eksterytaryjalnaj i ŭniviersalnaj jurysdykcyi.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary
Zvarot losu, tak by mović