Ci vinavataja Cichanoŭskaja ŭ tym, što Łukašenka nie vypuskaje palitviaźniaŭ?
U fejsbuku aktyvizavałasia daŭniaja tema — chto vinavaty ŭ tym, što stan z palitviaźniami ŭ Biełarusi nie tolki nie palapšajecca, ale navat paharšajecca? Moža, tut vina nie tolki režymu, ale i jahonych apanientaŭ, jakija zajmajuć niahnutkuju pazicyju i nie chočuć jaje mianiać? I jakaja pazicyja bolš słušnaja i kanstruktyŭnaja — cisk na režym ci zhoda na jahonyja ŭmovy?
Spačatku daradca Śviatłany Cichanoŭskaj Francišak Viačorka vykazaŭsia adnosna dastatkova papularnych zakidaŭ u adras Ofisa Cichanoŭskaj, što jon ničoha nie robić dla taho, kab palitviaźni apynulisia na voli. Jon z hetym nie zhodny i pryvodzić niekalki kankretnych prykładaŭ, kali režymu sprabavali iści nasustrač, ale nie atrymlivali ničoha istotnaha ŭ adkaz:
«Byli zroblenyja šmatlikija sproby dabicca vyzvaleńnia, luboha dyjałohu ŭ hetym pytańni. My zadziejničali ŭsie najaŭnyja miechanizmy.
Peŭnyja sproby rabiŭ śpiecpasłańnik Kient Charštet, padčas šviedskaha staršynstva ŭ ABSIE. Pryjazdžaŭ u Miensk, damaŭlaŭsia, i potym ničoha nie adbyvałasia. AANaŭskija čynoŭniki (bieź imionaŭ) pieradavali śpisy na vyzvaleńnie pa humanitarnych pryčynach. Niekalki pasłoŭ jeŭrapiejskich krain, jakija praciahvajuć pracu ŭ Minsku, asabista sustrakalisia z Makiejem na hetuju temu. Pradstaŭnik PARIE praciahvaje vieści kamunikacyju z MZS, kab dabicca vyzvaleńnia ci chacia b zapuścić praces. Niekatoryja dziaržavy prapanoŭvali vyvieźci vyzvalenych z krainy. Šviejcarski centr humanitarnaha dyjałohu na praciahu dvuch hadoŭ sprabuje pravodzić kansultacyi ŭ Miensku pa vyzvaleńni palitviaźniaŭ, ale heta nikudy nie pryviało».
Viačorka adznačaje, što miechanizm abiacańnia sastupak režymu ŭ admien na vyzvaleńnie palitviaźniaŭ taksama prymianiaŭsia:
«My čuli, što ŭ pryvatnych razmovach režym abiacaŭ vyzvalić ledź nie 300 palitviaźniaŭ (u roznych krynicach ličba roznaja) u miežach anansavanaj amnistyi.
I heta b mahło prypynić uviadzieńnie sankcyjaŭ. Praz heta abiacańnie navat było adkładziena prymianieńnie sankcyjaŭ. Ale čas minuŭ — nikoha nie vyzvalili».
Ahulnaja vysnova takaja:
«Na praciahu apošnich dziesiacihodździaŭ palitviaźniaŭ vyzvalaŭ najpierš cisk. Kali u Miensk pryjazdžaŭ Dejvid Krejmier i pryhraziŭ mahutnymi sankcyjami ZŠA, palitviaźni byli vyzvalenyja ciaham niekalkich miesiacaŭ. Mahčyma, pakul u Miensku nie adčuvajuć, što pahroza sankcyjaŭ dastatkova mocnaja, kab iści na sastupki».
Zapiarečyŭ Viačorku taksama ŭ fejsbuku pradstaŭnik kamandy palitźniavolenaha Viktara Babaryki Ivan Kraŭcoŭ. Jon pahadziŭsia, što
«ŭłady Biełarusi na siońniašni momant nie hatovyja vieści pradmietnuju razmovu. U ich niama razumieńnia, jak vychodzić ź situacyi, u jakoj jany apynulisia. I samaje hałoŭnaje — niama razumieńnia składanaści hetaj situacyi».
U toj ža čas nie z usim skazanym Viačorkam jon zhodzien. Tych ža namahańniaŭ jeŭrapiejskich struktur pa dasiahnieńni parazumieńnia z režymam, jakija daradca Cichanoŭskaj pieraličyŭ, Kraŭcoŭ nie admaŭlaje, ale śćviardžaje, što hetyja namahańni byli prykładzienyja imi pa ŭłasnaj inicyjatyvie, a Ofis Cichanoŭskaj byŭ da ŭsiaho hetaha ni pry čym. Pavodle jaho, na ŭsich sustrečach ź jeŭrapiejskimi palitykami, na jakich jon prysutničaŭ,
«pazicyja Ofisa Cichanoŭskaj zaŭsiody była adnaznačnaja: a) nijakich kantaktaŭ z režymam; b) usie palitviaźni pavinny być vyzvalenyja biez umoŭ, i tolki potym mahčymyja pieramovy»; v) «nijakaha handlu z režymam».
U vyniku, jak ličyć Kraŭcoŭ, «u ramkach stratehii «delehitymizacyi režymu» rabilisia namahańni, kab hetych miechanizmaŭ dla abmierkavańnia temy palitviaźniaŭ nie rabiłasia bolš».
U vyniku, kanstatuje hramadski aktyvist:
«a) pośpiechaŭ na hetym kirunku praktyčna niama; b) režym nie hatovy abmiarkoŭvać vyzvaleńnie palitviaźniaŭ.
I narešcie, praktyčnaja prapanova, jakaja maje pryvieści da pośpiechu ŭ vyzvaleńni palitviaźniaŭ:
«Ofisu jak lidzirujučaj źniešniepalityčnaj kamandzie varta nie sabatavać hetyja pracesy, a prynamsi zaniać niejtralnuju pazicyju».
Kamientary