165 žycharoŭ bielhijskaj vioski vyjhrali džekpot łatarei EuroMillions. Kožny ź ich atrymaje kala 868 tys. jeŭra
Sindykat sa 165 žycharoŭ nievialikaj vioski ŭ Bielhii staŭ pieramožcam čarhovaha rozyhryšu jeŭrapiejskaj łatarei EuroMillions. Hrupa bielhijcaŭ sarvała džekpot u pamiery bolš čym 143 młn jeŭra, a heta aznačaje, što kožny ź ich atrymaje kala 868 tys. jeŭra, paviedamili arhanizatary łatarei.
U ahulnaj kolkaści łatarejnyja bilety ŭ hety raz kupiła bolš za 27 młn jeŭrapiejcaŭ, piša Bi-bi-si.
Aficyjnaja pradstaŭnica bielhijskaj Nacyjanalnaj łatarei Džek Viermojer raspaviała, što žychary krainy časta hulajuć hrupami, ale nikoli jašče sindykat pieramožcaŭ nie byŭ nastolki šmatlikim.
Usie ŭdzielniki sindykata žyvuć u nievialikaj vioscy Dolmien niepadalok ad Antvierpena (jaje nasielnictva składaje kala 3,7 tys. čałaviek). Kožny ź ich zapłaciŭ za łatarejnyja bilety, nabytyja ŭ miascovaj kramie, adnolkavuju sumu, to-bok pryz budzie padzieleny na ŭsich paroŭnu.
Viermojer, jakaja ŭ sieradu prysutničała ŭ toj samaj kramie, kali niekatorym udzielnikam sindykata paviedamili ab ich pośpiechu, apisała atmaśfieru jak spałučeńnie spakoju i ejfaryi. Jana apisała pieramohu jak «samy lepšy padarunak da Kalad».
Uładalnik kramy, jaki arhanizoŭvaŭ padobnyja sindykaty dla hulni ŭ łatareju na praciahu niekalkich hadoŭ, raspavioŭ bielhijskamu radyjo, što jamu daviałosia paŭtarać paviedamleńnie pra vyjhryš piać-šeść razoŭ, pierš čym niekatoryja pieramožcy jamu pavieryli.
Imiony ŭdzielnikaŭ sindykata nie abviaščajucca.
Choć apošni džekpot EuroMillions skłaŭ davoli vialikuju sumu, jon nie samy vialiki ŭ historyi. U lipieni adzin z žycharoŭ Vialikabrytanii vyjhraŭ u hetuju łatareju 195 młn funtaŭ, a za niekalki miesiacaŭ da hetaha brytanskaja siamiejnaja para atrymała pryz 184 młn funtaŭ.
U łatarei EuroMillions udzielničajuć žychary dzieviaci jeŭrapiejskich krain, u tym liku Bielhii, Francyi, Vialikabrytanii, Ispanii, Partuhalii, Irłandyi, Aŭstryi, Šviejcaryi i Luksiemburha.
Kamientary