Źnižki na Geely ad Łukašenki bolš niama? Što ciapier z cenami na biełaruska-kitajskija aŭtamabili
Paśla taho jak Łukašenka aburyŭsia koštam novych Geely, ceny na ŭsie try madeli marki, dasiažnyja ŭ Biełarusi, adnamomantna źnizili na 15%. Adnak dyskont ad Łukašenki pratrymaŭsia niadoŭha. Prynamsi, adna z troch madelej značna padaražeła. Vyśvietlili, čamu tak adbyłosia, pa jakich cenach ciapier pradajuć novyja Geely i ci jość jany ŭ najaŭnaści.
Jak źmianialisia ceny na «ajčynnyja» aŭtamabili
Da abureńnia Łukašenki Geely ŭ Biełarusi pradavali pa nastupnych cenach:
- Coolray — ad 74 300 rubloŭ
- Atlas Pro — ad 87 400 rubloŭ
- Tugella — ad 108 800 rubloŭ.
Paśla anansavanaj źnižki tyja samyja aŭtamabili pačali realizoŭvać na 15% tańniej.
Užo z 2 červienia ceny na Geely vyhladali tak:
- Coolray — ad 62 815 rubloŭ
- Atlas Pro — ad 73 950 rubloŭ
- Tugella — ad 92 140 rubloŭ.
Pa stanie na 26 kastryčnika prajs na biełaruska-kitajskija aŭtamabili vyhladaje nastupnym čynam:
Košt Geely Atlas Pro i Geely Coolray zastaŭsia niaźmiennym — 73 950 i 62 815 rubloŭ adpaviedna. U toj ža čas samy darahi krasovier — Geely Tugella — staŭ jašče daražejšym. Ciapier jaho možna nabyć pa canie ad 111 600 rubloŭ.
Tugella padaražeła nie tolki adnosna cany, jakaja atrymałasia paśla abjaŭlenaj źnižki, ale i adnosna toj, što była da jaje.
Jak vyśvietliłasia, źnižki na Geely Tugella prybrali jašče ŭ vieraśni. Z nadychodam vosieni hetuju madel pačali pradavać pa tych cenach, što i da ŭviadzieńnia «źnižki ad Łukašenki». Paźniej u prodaž pačali pastupać nibyta restajlinhavyja aŭtamabili, tamu ceny na Tugella znoŭ pajšli ŭharu.
Toj fakt, što paśla restajlinhu cana na aŭtamabil moža vyraści, u pryncypie, nie vyklikaje ździŭleńnia, ale reč u tym, što restajlinh u Geely Tugella adbyŭsia vielmi ŭmoŭny. Hety fakt padčas razmovy nie abviarhajuć navat sami pradaŭcy. Anansavanyja źmieny ŭ vypuščanych aŭtamabilach nie padpadajuć pad kłasičnaje razumieńnie hetaha paniaćcia, pakolki restajlinhavy i darestajlinhavy aŭtamabil u hetym vypadku amal ničym nie adroźnivajucca.
Pa słovach mieniedžaraŭ, «asučaśnieny» aŭtamabil ad staroha budzie adroźnivacca abnoŭlenym vychłapam, koleram płastyku, jaki idzie pa nižniaj častcy mašyny, i ŭzoram malunka na kołavych dyskach. Aproč hetaha, nazvanyja niaznačnyja źmieny ŭ častcy płastyku na piarednim bampiery.
Kali kazać pra mašyny ŭ bolš bahataj kamplektacyi, to ŭ abnoŭlenym varyjancie, aproč vyšej zhadanych źmien, źjaŭlajecca čornaja stol, prajekcyja na łabavoje škło i aŭdyjasistema BOSE. Naturalna, što i cana takoha aŭto budzie vyšejšaja.
Užyvańnie termina «restajlinh» da hetaha aŭto pradaŭcy tłumačać tym, što dla kitajskich vytvorcaŭ źmiena kamplektacyi aŭto, kalarovych rašeńniaŭ i ŭzoru na dyskach — heta ŭžo nibyta restajlinh. Kali b heta byŭ aŭtamabil vytvorčaści niejkaha suśvietnaha brenda, to pra nijaki restajlinh razmovy b nie było, bo faktyčna ŭ mašynie ničoha nie źmianiłasia. Pa fakcie heta prosta aŭtamabili ŭ abnoŭlenaj kamplektacyi.
Toje, što praz abnaŭleńnie kamplektacyi aŭtamabil padaražeŭ, adnosna zrazumieła, a voś čamu łukašenkaŭskaja źnižka na Geely ź vieraśnia raspaŭsiudžvajecca tolki na dźvie z troch madelaŭ — pytańnie adkrytaje. Ale, tak ci inakš, jašče dva miesiacy tamu Geely Tugella prapanoŭvalisia pa cenach ad 92 140 rubloŭ, a ciapier ceny na anałahičnyja aŭto biełaruska-kitajskaj vytvorčaści startujuć z adznaki ŭ 111 600, što amal na 20 tysiač bolš, čym było ŭletku.
Vynikaje, što spačatku Geely Tugella patańnieła na 15%, a ŭžo praz paru miesiacaŭ padaražeła na 21%. Choć kurs dalara za hety čas źniziŭsia na 5%, a kurs jeŭra — na 8%.
A što z popytam i najaŭnaściu takich aŭto?
Niahledziačy na toje, što Tugella zaŭvažna padrasła ŭ canie, popyt, pa słovach mieniedžaraŭ, na takija aŭto jość. Bolš za toje, ciapier niemahčyma pryjści ŭ sałon, vybrać aŭto i adrazu źjechać na im dadomu. Reč u tym, što ni Tugella, ni aŭto dźviuch inšych madelaŭ u najaŭnaści niama. Najbližejšyja pastaŭki płanujucca na listapad, achvotnym nabyć aŭto prapanujuć pakinuć svaje kantakty abo zapisacca ŭ list čakańnia.
Kamientary
Za eti hrošy v etom vašiem ES zahnivajuŝiem možno kupiť: Opiel astra v žirie priedyduŝieho pokolenija, Opiel mokka, čuť dobaviť i kupiť astru novoho pokolenija v hibridnoj viersii. Pro raźnicu v avto hovoriť nie budu. Eto biessmyślenno.
Jeśli vziať rynok b/u. Insihnija s probiehom do 50 tysiač v połnom faršie i ostanietsia tysiač 10. Eto s płoŝadki of dilera. V łukoriejchie nie budiet normalnoj žiźni, tiechnołohij, kompanij.