Na kinafiestyvali «Paŭnočnaje źziańnie» pakažuć anłajn ukrainskija dakumientałki
8-my kinafiestyval «Paŭnočnaje źziańnie» prezientavaŭ śpiecyjalnuju prahramu «Ukraine mon amour», stvoranuju na znak salidarnaści z Ukrainaj. U jaje ŭvajšli try ŭkrainskija filmy, jakija byli zroblenyja razam z Nardyčnymi i Bałtyjskimi krainami. Hetyja i inšyja filmy kinafiestyvalu sioleta možna budzie pahladzieć z 20 pa 30 listapada biaspłatna.
Jakija dakumientałki pakažuć u ramkach ukrainskaj prahramy?
«Hety doždž nikoli nie skončycca»
2020, Ukraina, Łatvija, Hiermanija, Katar
Pakaz — 20 listapada
Čorna-bieły film, stvorany ŭkrainskaj režysiorkaj Alinaj Horłavaj. Heta vizualna vytančanaje i daskanała zmanciravanaje dakumientalnaje kino pra ŭcioki ad vajny. «Hety doždž nikoli nie skončycca» dapamahaje pahladzieć praz pryvatnuju historyju adnoj siamji na hłabalny bieśpierapynny cykł vajny i miru. Pa słovach Aliny Horłavaj, jany z kamandaj filma imknulisia pakazać dualnaść śvietu, jaho kantrasty. Kali isnujuć humanitarnyja misii i ŭ toj ža čas takija militaryzavanyja padziei, jak vajenny parad.
Film atrymaŭ mnostva ŭznaharod. Pieršapačatkova režysiorka płanavała źniać karotki mietr pra Danbas i nie ŭjaŭlała, što paznajomicca z hierojem, čyja historyja zaviadzie ŭ Irak i Hiermaniju, padšturchnie zdymać bolš za 30 hadzin pieravoz pamierłaha baćki hałoŭnaha hieroja ŭ Siryju, a zdymki ŭsiaho filma zojmuć čatyry hady.
Zaraz Alina Horłava praciahvaje znachodzicca ŭ Kijevie i tam zdymaje vajnu.
«Zvonku»
2022, Ukraina, Danija, Niderłandy
Pakaz — 23 listapada
«Zvonku» — poŭnamietražny dakumientalny debiut ukrainskaj režysiorki Volhi Žurby, jaki jana stvarała 7 hadoŭ. Film-padarožža i film-partret chłopčyka Romy, jaki idzie pa žyćci jak pa haračych vuhlach — biednaści, revalucyi i biazdomnaści. Dziakujučy telefonnym razmovam pamiž chłopčykam i režysiorkaj, videazapisam z kamier nazirańnia i zdymkam drejfu Romy pa žyćci, składajecca historyja pra maładoha čałavieka, kinutaha baćkami, a potym i sistemaj, pra pošuk svajho miesca ŭ śviecie i svajho doma.
Režysiorka źviartaje ŭvahu na samaje strašnaje, što adbyvajecca z takimi dziećmi, — na abyjakavaść hramadstva. «My zaŭvažajem hetych dziaciej tolki tady, kali jany nam naškodziać, paśla čaho my ich adpraŭlajem za kraty», — razvažaje Volha Žurba i padymaje hetaje pytańnie ŭ svaim filmie.
«Dom z askiepkaŭ»
2022, Danija, Šviecyja, Finlandyja, Ukraina
Pakaz — 25 listapada
Dakumientalny film «Dom z askiepkaŭ» pryśviečany historyi prytułku dla dziaciej va ŭschodnim horadzie Ukrainy — Lisičansku, kudy źmiaščajuć dziaciej ź niebiaśpiečnych siemjaŭ na 9 miesiacaŭ. Paśla hetaha im znachodziać novy dom, ci jany viartajucca ŭ stary, ci ž pieramiaščajucca ŭ dziciačy dom.
Dacki režysior Symon Lerenh Vilmont u «Domie z askiepkaŭ» praciahvaje temu svajho pieršaha filma «Sabačy brech udalečyni», prapanoŭvajučy ŭnikalny pohlad na toje, jak doŭhaterminovyja nastupstvy vajny adbivajucca na hramadstvie, asabliva na dzieciach. Heta praniźlivy i hłyboka intymny partret pramiežkavaj stancyi i pry hetym kranalnaje antyvajennaje vykazvańnie pra toje, jak sacyjalnaja niespraviadlivaść farmuje vyvučanuju biezdapamožnaść z samaha rańniaha ŭzrostu.
Usia prahrama «Ukraine mon amour» budzie dastupnaja biaspłatna ŭ farmacie online pa papiaredniaj rehistracyi, jakaja pačnie pracavać u pačatku listapada.
Hladzieć filmy «Źziańnia» možna budzie z 20 pa 30 listapada, jany buduć dastupnyja 24 hadziny zhodna z raskładam, jaki zusim skora budzie dastupny na aficyjnym sajcie «Paŭnočnaha źziańnia». Užo ciapier vy možacie padtrymać fiestyval danatam.
Ciapier čytajuć
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka1
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary