«Ja adčuvaju abdymki syna i zaraz»: apošniaje słova ŭ sudzie žurnalistki Ksienii Łuckinoj
U Minskim haradskim sudzie 21 vieraśnia byłaja žurnalistka Biełteleradyjokampanii Ksienija Łuckina vystupiła z apošnim słovam. Ksieniju vinavaciać ŭ zmovie ci inšych dziejańniach, učynienych z metaj zachopu dziaržaŭnaj ułady (č. 1 art. 357 Kryminalnaha kodeksu). Prakuror zapatrabavaŭ dla jaje vosiem hadoŭ kałonii, paviedamlaje «Viasna».
Razhladaje spravu sudździa Taćciana Falkoŭskaja.
Ksienija Łuckina da žniŭnia 2020 hoda pracavała ŭ Biełteleradyjokampanii. Paśla prezidenckich vybaraŭ dałučyłasia da strajku supracoŭnikaŭ chołdynhu, a zatym syšła z pazicyi karespandenta telekanała «Biełaruś 2» i ŭvajšła ŭ asnoŭny skład «Kaardynacyjnaj rady».
Jana raskazavała, što razam ź inšymi žurnalistami, jakija zvolnilisia, jany płanavali stvaryć «alternatyŭnaje telebačańnie» na YouTube. Prajekt raźvivaŭsia ŭ tym liku pry ŭdziele Akademii Pres-kłuba. Pieršyja pieradačy byli zapisanyja, zapusk pavinien byŭ adbycca ŭ studzieni 2021.
Ksieniju zatrymali 22 śniežnia 2020 ŭ Minsku na bulvary Mulavina. U svaim apošnim słovie žurnalistka Ksienija Łuckina ŭzhadała dni razam z synam pierad zatrymańniem:
— 21 śniežnia 2020 hoda my z synam prybirali jełku, rychtavalisia da lubaha śviata. U mianie było adčuvańnie, što ŭsie budzie dobra. Ranicaj 22 śniežnia ja pravodziła Maćvieja ŭ škołu, abniała i pacałavała. Ja i siońnia adčuvaju hetyja abdymki. Ja zasynaju i pračynajusia z hetym adčuvańniem.
Naša jełka staić u chacie ŭžo 21 miesiac. Maćviej nikomu nie daje jaje prybrać — jon čakaje mamu.
Ksienija skazała, što jaje hałoŭnaje žadańnie siońnia — viarnucca da syna:
— Jamu patrebna maci. Nie siabra, nie prosta darosły pobač, a maci. Čałaviek, jaki kožny dzień doryć pačućcio nieabmiežavanaj lubvi, pačućcio biaśpieki, doryć toje samaje dziacinstva. Bolš za ŭsio ja chaču viarnuć vieru ŭ dabryniu i spraviadlivaść. Ja chaču vychavać čałavieka, hramadzianina, čałavieka, jaki ŭmieje rabić pravilnyja vysnovy. Viarchoŭny sud, prašu ab litaści i humannaści, ab mahčymaści viarnucca ŭ hramadstva i prynosić jamu karyść, zahładzić svaju vinu słovam i spravaj. Moj syn maje patrebu ŭva mnie.
Taksama ŭ apošnim słovie Ksienija nahadała ab svajoj chvarobie i nieabchodnaści ŭ miedycynskaj dapamozie śpiecyjalistaŭ na svabodzie.
Prysud joj budzie abvieščany 28 vieraśnia.
Ciapier čytajuć
Maryna Adamovič apublikavała novyja FOTY Mikoły Statkieviča2
Kamientary