«Sprava traŭmatołahaŭ»: ludziej nie vypuskajuć praz 10 sutak, stali viadomyja detali abvinavačvańnia

«Napačatku Departamient finansavych rasśledavańniaŭ zacikaviŭsia pastaŭščykom u Biełaruś niamieckich endapratezaŭ Waldemar Link (adnosna inšych vytvorcaŭ niama ŭpeŭnienaści), i adtul užo pačali cikavicca ŭsimi śpiecyjalistami, chto ź imi pracavaŭ, — paviedamiła «Našaj Nivie» abaznanaja krynica. — 

Papiarednie ŭ finansavyja adździeły špitalaŭ byli dasłanyja zapyty, chto z daktaroŭ vykonvaŭ endapratezavańnie sustavaŭ nie ź biudžetnych zakupaŭ, a na padstavie apłaty pacyjentam, i ŭ vyniku amal usich z hetych śpisaŭ zatrymali». 

Sama sprava, jak my raniej paviedamlali, vyrasła z taho, što endapratezavańnie pravodzicca na padstavie čarhi, jakaja ŭžo niepamierna raściahnułasia i, u asobnych vypadkach, pieravyšaje 5 hadoŭ čakańnia.

Tut treba razumieć, što sami pratezy, jakija dziaržava zakuplaje vializnymi partyjami na padstavie konkursu (jaho prazrystaść možna abmiarkoŭvać), nie zaŭsiody adpaviadajuć patrabavańniam pacyjenta: pratezy — heta štučny pradukt z šyrokaj namienkłaturaj pamieraŭ.

I časam niekatoryja ź ich lažać tak doŭha, što ŭžo nie mohuć być vykarystanyja z-za zakančeńnia terminaŭ sterilnaści (znoŭ zasterylizavać hetyja kampanienty biez paharšeńnia ich jakaści amal niemahčyma, i vytvorca heta zabaraniaje).

Čytajcie: Pa ŭsioj krainie zatrymali kala 30 artapiedaŭ-traŭmatołahaŭ

«Pacyjenty ŭ čakańni apieracyi šukajuć alternatyŭnyja varyjanty, i im prapanoŭvajuć pazačarhovaje endapratezavańnie, ale z umovaj nabyćcia prateza za ŭłasnyja hrošy, a nabyć možna ź nievialikaha pieraliku varyjantaŭ, jakija akurat i pastaŭlajucca ŭ Biełaruś tolki pryvatnymi firmami.

Takaja schiema isnuje lehalna ŭvieś pieryjad praviadzieńnia takich apieracyj u Biełarusi (z kanca 90-ch), rynak uvieś čas krychu mianiaje list prapanoŭ. Viadoma, siarod pastaŭščykoŭ jość kankurencyja, i jany starajucca zacikavić daktaroŭ rekłamavać pradukcyju kankretnaha vytvorcy, jakuju možna znajści ŭ kankretnaha dylera.

I kryminalnuju cikavaść vyklikali, imavierna, adnosiny doktara z pastaŭščykom, chacia naŭprost jany, jak byccam, i nie kantaktujuć», — paviedamlajuć nam abaznanyja krynicy. 

Miedyki z hetaj śfiery kažuć, što historyja paŭtarajecca ŭžo nie ŭpieršyniu. 

«Sprava daktaroŭ 2018 hoda była pabudavanaja na hetych ža schiemach, i tady, jak viadoma, prafiesara Bialeckaha asudzili, a ministra achovy zdaroŭja Žarko «nie zaŭvažyli», chacia mienavita ministerstva robić usio, kab takija schiemy kvitnieli. U cyvilizavanych krainach doktar maje mahčymaść vykarystoŭvać usiu liniju kampanientaŭ na etapie vybaru i padčas apieracyi, a ŭ Biełarusi naadvarot — jon musić padbirać pacyjenta pad pratez u najaŭnaści, ale tak, zrazumieła, nie musić być», — takuju acenku daje adzin ź biełaruskich artapiedaŭ. 

Z 2018 hoda dadali niekalki biurakratyčnych elemientaŭ nakštałt «kamisii pa pazačarhovym endapratezavańni», dzie rašeńnie ab terminovaj apieracyi prymaje kamanda daktaroŭ.

«Raniej zahadčyk adździaleńnia sam nakiroŭvaŭ pacyjenta ŭ adździeł pazabiudžetnaj dziejnaści i pryznačaŭ termin apieracyi, apošnim časam heta rabiła kamisija. Tamu i była ŭ daktaroŭ upeŭnienaść, što ŭsio zakonna, bo kožny krok u adnosinach z pacyjentam na dałoni — u dakumientach balnicy. Ale sutnaść ad hetaha nie źmianiłasia, u 6-j balnicy, naprykład, zatrymali ŭsich udzielnikaŭ hetaj kamisii, — tłumačyć artapied. — 

Miarkuju, im usim prapanujuć «kampiensavać škodu», i zaadno zrobiać ich vinavatymi ŭ vieličeznych čerhach, chacia prośby daktaroŭ pamianiać schiemu zakupaŭ hučać ledź nie štodzień». 

«Naša Niva» adnaŭlaje zbor danataŭ — padtrymać prosta

• 7
• 0
• 8
• 58
• 5
• 72
• 65
• 0