Na kiroŭcu vajskovaha ciahača, jaki najechaŭ na cyvilnaje aŭto, zaviali kryminalnuju spravu.
Śledstva vyśvietlić, ci byŭ vinavaty vajskoviec terminovaj słužby ŭ DTZ, u vyniku jakoha zahinuŭ 17-hadovy kiroŭca džypa.
Baranavickaja mižharnizonnaja prakuratura raspačała kryminalnuju spravu ŭ dačynieńni da vajskoŭca terminovaj słužby adnoj z Navahrudskich vajskovych čaściej pavodle č. 2 art. 464 KK RB (parušeńnie praviłaŭ kiravańnia abo ekspłuatacyi mašyn, jakoje paciahnuła pa nieaściarožnaści śmierć čałavieka abo pryčynieńnie ciažkaha cialesnaha paškodžańnia).
DTZ zdaryłasia 28 maja na lasnoj darozie kala v. Pałonka. Kałona vajskovaj techniki biez supravadžeńnia ruchałasia z Abuz-Lasnoŭskaha palihonu ŭ bok miesca dysłakacyi — u Navahrudak. Pavodle papiarednich dadzienych, ciahač MTŁBu, jaki jechaŭ druhim i jakim kiravaŭ 20-hadovy šarahoviec terminovaj słužby adnoj z Navahrudskich vajskovych čaściej, sutyknuŭsia z džypam «Chundaj». U vyniku 17-hadovy kiroŭca aŭto ad atrymanych paškodžańniaŭ zahinuŭ u Baranavickaj haradskoj balnicy. Śviedki incydentu dali roznyja pakazańni, tamu śledstvu treba vyśvietlić — ruchaŭsia džyp nasustrač kałonie vajskovaj techniki, ci stajaŭ na ŭzbočynie, prapuskajučy kałonu. U džypie znachodzilisia taksama dźvie vypusknicy Pałonkaŭskaj siaredniaj škoły, jakija trapili ŭ balnicu z traŭmami. Adna ź ich užo znachodzicca doma, druhaja — u adździaleńni traŭmatałohii.
.Ciapier čytajuć
«Kali pasadziać znoŭ, to pasiadžu». Pačobut pra svajo vyzvaleńnie, kamiery śmiarotnikaŭ, bitvu za honar u sudzie i žadańnie viarnucca10
Kamientary