Homielskim aktyvistam apazicyi KDB viarnuŭ kampjutery, kanfiskavanyja ŭ 2007 h. Mała taho, ustalavaŭ fajły sa statutam, ankietaj, pamiatkami arhanizacyi «Małady front».
Aktyvistam homielskaj kaalicyi Abjadnanych demakratyčnych sił 11 maja Upraŭleńnie KDB pa Homielskaj vobłaści viarnuła šeść kampjuteraŭ, kanfiskavanych padčas vobysku ŭ kastryčniku 2007 hoda.
Jak paviedamiŭ BiełaPAN staršynia abłasnoj arhanizacyi AHP Vasil Palakoŭ, nie ŭsia arhtechnika, jakuju viarnuli śpiecsłužby, była ŭ spraŭnym stanie. «Z majho kampjutera źnikła sistemnaja karta,
ale razam z tym źjavilisia fajły, jakich da vobysku i kanfiskacyi techniki nie było, — statut, ankieta, pamiatki arhanizacyi «Małady front», jašče ŭ prydaču i vosiem virusaŭ», — adznačyŭ lider abłasnoj arhanizacyi.
Jon vykazaŭ zdahadku, što dakumienty, jakija tyčacca dziejnaści mižnarodnaj arhanizacyi «Małady front» (Čechija), byli źmieščany kimści ŭ kampjuter naŭmysna, kab niejak apraŭdać toj fakt, što va ŭpraŭleńni KDB arhtechnika znachodziłasia paŭtara hoda. Jana była kanfiskavana na padstavie taho, što źjaŭlajecca rečavym dokazam pa kryminalnaj spravie ŭ dačynieńni da niezarehistravanaj arhanizacyi. «Vierahodna, supracoŭniki śpiecsłužbaŭ sami nie viedali, ci spatrebiacca im u budučym kampjutery jak rečdokazy i suprać kaho — na ŭsiaki vypadak chtości paznačyŭ fajły z dakumientami», — ličyć Palakoŭ.
Vobysk i kanfiskacyja arhtechniki adbylisia ŭ ofisie abłasnoj arhanizacyi AHP u kastryčniku 2007 hoda. Supracoŭniki KDB rastłumačyli svaje dziejańni praviadzieńniem apieratyŭnych mierapryjemstvaŭ pa kryminalnaj spravie ŭ dačynieńni da členaŭ niezarehistravanaj arhanizacyi «Małady front». U toj čas padazronymi ŭ dziejnaści ad imia niezarehistravanaj arhanizacyi byli maładziožnyja aktyvisty z Homiela i Žłobina Andrej Cianiuta i Kirył Atamančyk. Kryminalnaja sprava ŭ dačynieńni da Cianiuty była spyniena, los kryminalnaj spravy ŭ dačynieńni da Atamančyka nieviadomy. Niadaŭna jon źviarnuŭsia va Upraŭleńnie KDB z patrabavańniem spynić kryminalny pieraśled u adnosinach da jaho.
Kamientary