«Prašu padtrymać svabodnyja i sumlennyja vybary ŭ Biełarusi». Valeryj Capkała napisaŭ adkryty list lidaram bolš čym 30 krain
Valeryj Capkała napisaŭ adkryty list (jość u rasparadžeńni telekanała «Dožd́») prezidentam i premjer-ministram 32 krain, u tym liku ZŠA, Hiermanii, Francyi, Vialikabrytanii i Ukrainy. Rasii ŭ hetym śpisie niama.
U im jon źviartaje ŭvahu, što ŭ Biełarusi ŭžo 26 hadoŭ kiruje adzin čałaviek, jaki stvaryŭ «aŭtarytarny režym, u jakim nie vykonvajucca asnoŭnyja kaštoŭnaści demakratyčnaha hramadstva: źmianialnaść ułady, svaboda słova i volevyjaŭleńnia, asnoŭnyja svabody čałavieka». Capkała adznačyŭ, što ciapier ułady Biełarusi «aktyŭna pieraškadžajuć» praviadzieńniu sumlennych i svabodnych vybaraŭ prezidenta, a taksama akazvajuć siłavy cisk «na ŭsich, chto žadaje spraviadlivaści i prazrystaści vybarčaha pracesu».
Jon źviarnuŭsia da lidaraŭ krain z prośbaj «padtrymać praviadzieńnie svabodnych i sumlennych prezidenckich vybaraŭ u Biełarusi i źviarnuć uvahu hramadskaści na antynarodnuju palityku, jakuju pravodzić biełaruski režym».
«Taksama ad asoby ŭsiaho biełaruskaha naroda prašu akazać sadziejničańnie ŭ arhanizacyi mižnarodnaha nazirańnia za vybarami i padlikam hałasoŭ, zabieśpiačeńni prazrystaści hetaha pracesu dla hramadzian Biełarusi, jakija znachodziacca na terytoryi vašaj svabodnaj krainy. Našy narody miescami abjadnoŭvaje kulturna-histaryčnaja spadčyna i ciesnyja rodnasnyja suviazi. My adnolkava razumiejem idei demakratyi i svabody», — havorycca ŭ liście.
Jon taksama pieraličvaje mety apazicyi, siarod jakich prazrystaść vybaraŭ, abrańnie Śviatłany Cichanoŭskaj u jakaści prezidenta krainy, vyzvaleńnie ŭsich palitviaźniaŭ, a taksama praviadzieńnie novych vybaraŭ u termin ad troch da šaści miesiacaŭ z udziełam usich alternatyŭnych kandydaŭ.
Valeryj Capkała nakiravaŭ list prezidentu ZŠA Donaldu Trampu, premjer-ministru Kanady Džaścinu Trudo, premjeru Vialikabrytanii Borysu Džonsanu, prezidentu Francyi Emanuelu Makronu, prezidentu Ukrainy Uładzimiru Zialenskamu, kancleru Hiermanii Anhiele Mierkiel, premjeru Armienii Nikołu Pašynianu, a taksama lidaram Bałharyi, Vienhryi, Hruzii, Italii, Łatvii, Litvy, Polščy i inšych krain.
Kamientary