Viarchoŭny Sud ZŠA pryznaŭ značnuju častku štata Akłachoma — kala pałovy jaho terytoryi — ziamloj, jakaja naležyć indziejskaj reziervacyi. Heta źmienić stanovišča karennych žycharoŭ štata.
Za takoje rašeńnie prahałasavali piaciora sudździaŭ, čaćviora vystupili suprać. Praktyčna ŭsia ŭschodniaja častka štata z nasielnictvam u 1,8 miljona čałaviek, ciapier aficyjna ličycca ziamloj indziejskich piaci plamionaŭ — čykasa, čokta, čeroki, sieminołaŭ i maskohaŭ, jakija adnosiacca da narodnaści kryk, ad imia jakoj i byŭ padadzieny pazoŭ da ŭrada štata.
Reziervacyja ŭklučaje ŭ siabie prykmietnuju častku Tałsy, druhoha pa kolkaści horada Akłachomy i centra naftazdabyčy.
Udakładniajecca, što rašeńnie suda paciahnie za saboj pierahlad sotniaŭ sudovych prysudaŭ — pradstaŭnikoŭ karennych narodaŭ pavinny sudzić albo plemiannyja sudy, albo, u vypadku surjoznych pravaparušeńniaŭ, fiederalnyja.
Vierahodna, što nastupstvy hetaha sudovaha rašeńnia adčuje na sabie padatkovaja sistema štata, ekałahičnaje rehulavańnie i ceły šerah inšych aparataŭ dziaržavy. Akramia taho, jaho nazyvajuć viachoj dla karennych amierykancaŭ u cełym — na padstavie hetaha precedentu buduć vieścisia dalejšyja spravy pa padobnych pytańniach.
Kamientary