U Hrodnie fihuranty «spravy Cichanoŭskaha» atrymali siońnia ad 5 da 10 sutak

U Harodni ŭ budynku abłasnoha suda praciahvajuć razhladacca administracyjnyja spravy zatrymanych padčas pikieta 29 traŭnia razam ź Siarhiejem Cichanoŭskim fihurantaŭ kryminalnaj spravy pa art. 342 KK. Heta palitviaźni Viarhilij Ušak, Alaksandr Aranovič i Arciom Sakaŭ. Pratakoły na ich składzieny za toj ža incydent 29 traŭnia — za jaki i zaviedziena kryminalnaja sprava, paviedamlajuć pravaabaroncy.

Pieršym razhladałasia sprava Viarhilija Ušaka. Na jaho składzieny dva pratakoły pra nibyta administracyjnyja pravaparušeńni — pavodle artykułaŭ 17.1 (chulihanstva) i 23.4 (niepadparadkavańnie supracoŭnikam milicyi). Praces viała sudździa Leninskaha rajonnaha suda Natalla Kozieł. Na pracesie vystupili jak śviedki słužboŭcy AMAPa Pavieł Konan, Dzianis Sierada i Siarhiej Rynko.

Pavialičyć

U vynik sudździa Natalla Kozieł zasudziła Viarhilija Ušaka ahułam da 7 sutak administracyjnaha aryštu (17.1 — 3 sutak, 23.4 — 4 sutak).

Pa takich ža artykułach druhi palitviazień Alaksandr Aranovič atrymaŭ 10 sutak aryštu (17.1 — 4 sutak, 23.4 — 6 sutak). Rašeńnie vyniesła taja ž sudździa.

Paśla abiedu pačała razhladacca administracyjnaja sprava apieratara «Krainy dla žyćcia» Arcioma Sakava. Na jaho składzieny pratakoł pa artykule 17.1 KaAP (drobnaje chulihanstva). Śviedkami vystupajuć milicyjanty Raman Mackievič i Siarhiej Bilida.

Pradstaŭnik orhana, jaki viadzie administracyjny praces, nie moh nazvać dakładnuju datu i abstaviny zatrymańnia Sakava (jaho zatrymlivali 31 traŭnia). 

Advakat źviartaje ŭvahu na toje, što pratakoł składzieny siomaha červienia, a pryvieźli jaho Sakavu ŭ Minsk tolki 12-ha. Sakava pa im nichto nie apytvaŭ, jon svaich tłumačeńniaŭ nie davaŭ.

Pieršy śviedka — supracoŭnik AMAPa Raman Mackievič. Jon nie pamiataje, va što byŭ apranuty Sakaŭ, videarehistratar nichto nie hladzieŭ. Jon i inšy śviedka Bilida nie mohuć zhadać, jakoj «niecenzurnaj łajankaj» łajaŭsia pry zatrymańni Arciom Sakaŭ. 

Advakat źviarnuŭ uvahu na parušeńni pravoŭ Arcioma Sakava, supiarečnaści ŭ pakazańniaŭ śviedak, zajaviŭ pra absalutnuju niedakazanaść viny Sakava i paprasiŭ spynić spravu. Ale sudździa Rusłan Huryn prysudziŭ jamu 5 sutak administracyjnaha aryštu.

U apošnija try dni taksama byli asudžany na «sutki» inšyja fihuranty «spravy Cichanoŭskaha» — Uładzimir Kniha, Jaŭhien Raźničenka, Vasil Babroŭski, Uładzimir Navumik, Źmicier Furmanaŭ i sam Siarhiej Cichanoŭski. 

• 0
• 0
• 0
• 0
• 0
• 0
• 0
• 0