Litoŭskaja prakuratura spyniła rasśledavańnie hibieli litoŭskaha dypłamata ŭ Biełarusi
Hramadskaje rasśledavańnie taksama vytchnułasia.
Dasudovaje rasśledavańnie abstavinaŭ śmierci aficera Dziaržaŭnaha departamienta biaśpieki i dypłamata Vitaŭtasa Paciunasa spyniajecca. Takoje rašeńnie pryniaŭ prakuror adździełu kantrola dasudovaha rasśledavańnia Mindaŭhas Hilis. Rasśledavańnie hetaj spravy było adnoŭlena 19 vieraśnia 2007 hoda paśla sudovaha zahadu vyjavić abstaviny śmierci. U adnu ź vilenskich sudovych ustanoŭ źviarnułasia ŭdava dypłamata Ludvika Paciunienie. Za novaje rasśledavańnie vystupaŭ i prezident Vałdas Adamkus.
Hibiel, pakrytaja zmrokam
Vitaŭtas Paciunas, ministr-daradca hienieralnaha konsulstva Litvy ŭ Hrodnie, zahinuŭ 23 žniŭnia 2006 hoda, vypaŭšy praz vakno hatela ź dzieviataha paviercha. U Breście jon znachodziŭsia ŭ słužbovaj kamandziroŭcy.
Cieła 48-hadovaha aficera było znojdziena zranku la hatela «Inturyst». Choć adrazu była ŭźniataja viersija pra hvałtoŭnuju śmierć, biełaruskija čynoŭniki śćviardžali, što mužčyna pa nieaściarožnaści vypaŭ sam.
Litoŭskija kansiervatary, jakija na toj čas znachodzilisia ŭ apazicyi, źviarnulisia da pravaabaroncaŭ z prapanovaj raspačać dziaržaŭnaje rasśledavańnie hetaj śmierci. Jeŭraparłamientar Vitaŭtas Łandśbierhis skazaŭ, što hibiel dypłamata – ni što inšaje, jak palityčnaje zabojstva. U tym, što V. Paciunas vypaŭ sam, sumniajucca i jahonyja svajaki.
Zatym pačalisia razmovy pra toje, što aficer moh być nakiravany ŭ Biełaruś suprać svajoj voli, kab adrezać jaho ad važnych rasśledavańniaŭ. Toje samaje śćviardžaje i ŭdava – žurnalistka Ł. Paciunienie. Adnak Departamient dziaržbiaśpieki zapiarečyŭ, što słužbu ŭ Biełarusi V. Paciunas abraŭ samastojna.
Rasśledavańnie hetaj śmierci aplecienaje pavucińniem viersij i mierkavańniaŭ. Naprykład, było ahałošana, byccam V. Paciunas znachodziŭsia ŭ niećviarozym stanie. U ŚMI taksama źjaviłasia infarmacyja, što jon moh vypaści z vakna, zhubiŭšy raŭnavahu pry sprobie pamačycca.
Ź ciaham času vyrastali novyja viersii: nibyta śmierć Paciunasa mahła być patrebnaja niekatorym jaho kaleham i źviazanych ź imi litoŭskim palitykam i biznes-strukturam.
Zahadkavuju pahibiel u Breście ŭzialisia rasśledavać nie tolki biełaruskaje, ale i litoŭskaje čynavienstva. Hetym zdareńniem zacikaviŭsia Nacyjanalny kamitet biaśpieki i abarony Sojmu.
Pazaletaś uvosień Biełaruś zajaviła, što kryminalnaja sprava ab śmierci V. Paciunasa ŭzbudžacca nie budzie, pakolki heta – niaščasny vypadak. I ŭžo praź miesiac litoŭskaja Hienieralnaja prakuratura abviaściła pra zakryćcio rasśledavańnia. Čynoŭniki paćvierdzili viersiju biełaruskich kalehaŭ i ŭdakładnili, što ŭstanoŭlenyja abstaviny śmierci nie majuć ničoha supolnaha z zajaŭlenymi detalami, jakija abražajuć pamiać pamierłaha (majecca na ŭvazie spraŭleńnie naturalnych patrebaŭ praz vakno).
Padčas rasśledavańnia prakurory pastanavili, što V. Paciunas sam vypaŭ praz vakno hatela «Inturyst». Vypadaŭ jon, jak śćviardžajecca, žyvy, a ŭsie paškodžańni byli naniesienyja ŭ vyniku padzieńnia z vyšyni i sutyknieńnia ź ćviordaj pavierchniaj.
Hramadskaje rasśledavańnie vytchnułasia.
Pad ciskam kansiervataraŭ Hiedyminas Kirkiłas, užo były premjer-ministr, stvaryŭ admysłovuju kamisiju, jakaja musiła jašče raz razhledzieć abstaviny pahibieli litoŭskaha aficera. Adnak dziejnaść hetaj kamisii aceńvali pa-roznamu, i navat prezident jaje skrytykavaŭ. Vykazvalisia taksama sumnievy, ci nie parušaje jana Kanstytucyju.
Stvoranyja premjeram pracoŭnyja hrupy byli aktyŭnymi tolki na samym pačatku. Adnak jašče da pasiadžeńniaŭ niekatoryja čynoŭniki admovilisia brać udzieł u dziejnaści pracoŭnych hrup, bo zasumniavalisia, ci nie budzie takoje rasśledavańnie dublavać pracu pravaachoŭnikaŭ. Letaś u sakaviku rasśledavańnie spyniłasia i ad taho času ŭžo nie adnaŭlałasia.
Hibiel V. Paciunasa była adnym z abjektaŭ rasśledavańnia dziejnaści Departamientu dziaržbiaśpieki. Vyniki hetaha rasśledavańnia prymusili hienieralnaha dyrektara Arvidasa Pociusa pakinuć svaju pasadu.
Hramadzianie Litvy, tym nie mienš, schilajucca da viersii, što Paciunas staŭ «niepažadanym śviedkam» i nie ličać, što adstaŭka Pociusa kardynalna źmianiła situacyju ŭ krainie. Ludzi patrabujuć arhumientacyi zakryćciu spravy zahadkavaj śmierci i bolšaj prazrystaści ŭ dziejnaści dziaržaŭnych struktur.
Kamientary