Piać važnych momantaŭ, jakija ahučyŭ Łukašenka ŭ pasłańni da parłamienta i naroda

Kiraŭnik Biełarusi Alaksandr Łukašenka ŭ Avalnaj zale źviarnuŭsia sa štohadovym pasłańniem da naroda i parłamienta. Vystup doŭžyŭsia dźvie hadziny, a jašče niejki čas jon adkazvaŭ na pytańni deputataŭ. Što ž važnaha skazaŭ Łukašenka? Pasprabujem ścisła pierakazać u hetym materyjale.

Pavialičyć

Namiakaŭ, što heta jaho apošni ci pieradapošni termin

Na pytańnie Aleny Anisim, jakuju jon uparta nazyvaŭ «Taćcianaj», pra pomniki zasnavalnikam BSSR Čarviakovu i Žyłunoviču, Łukašenka adkazaŭ: «Moža, heta vy ŭžo z nastupnym prezidentam».

Jašče raz pra svajho pierajemnika jon staŭ havaryć, kali zajšła razmova pra źmieny ŭ Kanstytucyi. Maŭlaŭ, jon nie choča pakidać nastupnamu prezidentu Kanstytucyju ŭ siońniašnim vyhladzie. Łukašenka choča źmienšyć paŭnamoctvy prezidenta i pašyryć paŭnamoctvy inšych orhanaŭ ułady, kab nastupnik zajmaŭsia bolš važnymi spravami, a nie «jeździŭ pa palach i kałhasach». Pry hetym jon skazaŭ, što jaho nie zadavolić varyjant «Łukašenka syšoŭ, ale nasamreč nie syšoŭ». «Takoha nie budzie — abiacaju».

Prezidenckija vybary projduć u 2020 hodzie. Praz šeść hadoŭ Łukašenku budzie ŭžo 70. U adzin z momantaŭ jon adznačyŭ, što piensijaniery mohuć aktyŭna pracavać da 75, a časam i da 80 hadoŭ.

Mahčyma, Łukašenka sapraŭdy pradbačyć, što heta jahonyja apošnija (ci pieradapošnija) vybary i apošni (ci pieradpošni) termin. A tut jašče prykład Nursułtana Nazarbajeva padviarnuŭsia, što možna rabić i tak.

Čytajcie taksama: Łukašenka anansavaŭ asłableńnie paŭnamoctvaŭ prezidenta pierad pieradačaj ułady

Paźbiahaŭ słova «Rasija»

Łukašenka padčas usiaho vystupu metanakiravana i paśladoŭna paźbiahaŭ vyrazaŭ kankretna pra Rasiju. Jasna, što šmat dzie heta vidavočna čytałasia. Naprykład, pra krainu, jakaja ŭviała handlovyja abmiežavańni suprać svajho stratehičnaha partniora. Ci pra kanały, jakija stvarajuć fejki pra Biełaruś z-za miažy. Kali Łukašenka nadzvyčaj koratka (dy jašče i paśla taho, jak było vyrašana važnaje pytańnie zarobkaŭ handbalistaŭ) začytaŭ pa papiercy tezisy pra mižnarodnyja adnosiny, to jon havaryŭ pra «sajuznuju dziaržavu» i Jeŭrazijski ekanamičny sajuz, ale nie naŭprost pra adnosiny z Rasijaj, jak z Kitajem i ZŠA. U adkazach na pytańni «Rasija» ŭžo stała hučać.

Toje, što z Rasijaj nie ŭsio dobra, možna mierkavać pa tych kpinach, jakija Łukašenka adpuskaŭ u adras pasła ŭschodniaj susiedki Michaiła Babiča. «Vidać, pasoł kiepska ličyć», — skazaŭ Łukašenka, kali adkazvaŭ na pytańnie deputatki Hanny Kanapackaj. Dumaju, tut mnohija pračytali aluziju na słovy pres-sakratara MZS Anatola Hłaza, jaki nazvaŭ Babiča «padajučym nadziei rachunkavodam». Mahčyma, mienavita Babiča mieŭ na ŭvazie Łukašenka, kali havaryŭ pra zamiežnikaŭ, jakija pryjechali ŭ Biełaruś i stali stvarać «staronki» z fejkami. «Treba budzie — vykidvajcie», — skazaŭ Łukašenka.

Abiacaŭ, nibyta vybary ŭžo pačalisia

Vystup Łukašenki byŭ vielmi papulisckim pa svajoj sutnaści. My ŭžo adznačyli, što jon zusim mała havaryŭ pra hieapalityčnyja rečy, jak i pra stan biełaruskaj ekanomiki. Zatoje jon šmat sypaŭ abiacańniami. Nie dapuskać inflacyju, vyšejšuju za 5%, dabicca taho, kab nie raśli ceny na asnoŭnyja vidy tavaraŭ. Abiacaŭ pavysić zarobki biudžetnikam (vychavacielam dziciačych sadkoŭ, jakija nidzie padpracavać nie mohuć u adroźnieńnie ad «niaščasnaha nastaŭnika»), spartsmienam. Zahadaŭ nie zvalniać piensijanieraŭ, kali jany mohuć jakasna vykonvać svaju pracu. «Biełaruskaja ŭłada — heta narodnaja ŭłada», — kazaŭ Łukašenka. Zarobki, ceny — heta toje, na što pajšła asnoŭnaja častka vystupu kiraŭnika krainy. Pasłańnie sapraŭdy była najpierš nakiravana na ŭnutranaha, a nie vonkavaha spažyŭca.

Mova i niezaležnaść dla Łukašenki nie tojesna

Łukašenka skazaŭ, kali niechta pasprabuje źniščyć Biełaruś, to jaho «praklanie biełaruski narod», a taksama zachopniki sutyknucca z uzbrojenym supracivam ad moładzi, jakaja naradziłasia i vyrasła ŭ niezaležnaj Biełarusi. Kiraŭnik krainy adznačaŭ, što handal niezaležnaściu zusim nie prymalny dla Biełarusi, a «intehracyju dziela intehracyi» jon nie prymaje. Intehracyja pavinna prynosić Biełarusi niejkuju karyść. U pryncypie, heta absalutna nijak nie roźnicca ad taho, što kiraŭnik krainy kazaŭ raniej.

Łukašenka pryhoža skazaŭ, što biełaruskaja mova — heta serca naroda. Ale našmat bolej vodhukaŭ sabrała historyja ad kiraŭnika krainy pra nadpis «vykonvaj chutkasny režym» — maŭlaŭ, hości našaj krainy nie zrazumiejuć, što tam napisana pa-biełarusku. Faktyčna takim čynam Łukašenka pakazaŭ, što biełaruskaja mova kinutaja na ałtar dobrych adnosinaŭ z Rasijaj. Kiraŭnik krainy dla siabie absalutna nie atajasamlivaje pytańni movy i niezaležnaści.

Padtrymka bujnych vytvorcaŭ, a nie siaredniaha biznesu

U ekanomicy ŭstanoŭka Łukašenki była vielmi prostaj: padtrymlivać treba najpierš i pryjarytetna bujnuju vytvorčaść. Bo jana prynosić krainie dalary, jeŭra i rasijskija rubli. A drobny i siaredni biznes va ŭsprymańni Łukašenki pa-raniejšamu «tarbešniki» i «miašečniki», jakija najpierš dumajuć pra svaje ŭłasnyja intaresy, a nie pra intaresy dziaržavy. Maŭlaŭ, voś u Italii siaredni i drobny biznes sapraŭdnyja, a ŭ nas niejkaja falšyŭka.

Kali była častka vystupa, pryśviečanaja IT-technałohijaj (usie parahatali z frazy pra «3D-pryntary, jakija nie nadrukujuć vam dziaciej»), to Łukašenka pastaviŭ prahramistam zadaču iści razam z hihantami našaj vytvorčaści. Takimi, jak MAZ i BiełAZ, stvarać novyja technałohii dla ich.

Apytanka

• 0
• 0
• 0
• 0
• 0
• 0
• 0
• 0