Lidary biełaruskaj apazicyi zaklikali prezidenta i premjer-ministra Polščy padtrymać «Chartyju-97»
«Zachavańnie sajta Charter97.org budzie słužyć biaśpiecy i niezaležnaści biełaruskaha i polskaha narodaŭ», — ličać składalniki lista.
Lidary biełaruskaj apazicyi nakiravali list prezidentu Polščy Andžeju Dudu i premjer-ministru krainy Matevušu Maravieckamu z prośbaj padtrymać pracu niezaležnaha infarmacyjnaha sajta Charter97.org, redakcyja jakoha praz represii z boku biełaruskich uładaŭ siońnia znachodzicca ŭ Varšavie. U hetym hodzie finansavańnie partała było značna skaročana.
Da kiraŭnikoŭ polskaj dziaržavy źviarnulisia: pieršy kiraŭnik niezaležnaj Biełarusi Stanisłaŭ Šuškievič, kiraŭnik pravaabarončaha centra «Viasna» Aleś Bialacki, lidary Biełaruskaha Nacyjanalnaha Kanhresu Mikałaj Statkievič i Uładzimir Niaklajeŭ, sustaršynia partyi «Biełaruskaja Chryścijanskaja Demakratyja» Pavieł Sieviaryniec, lidar prafźviazu rabotnikaŭ radyjoelektronnaj pramysłovaści (REP) Hienadź Fiadynič, kaardynatar hramadzianskaj kampanii «Jeŭrapiejskaja Biełaruś» Jaŭhien Afnahiel.
U liście lidaraŭ biełaruskaj apazicyi havorycca:
My chacieli b vykazać padziaku polskaj dziaržavie za zaprašeńnie i mahčymaść pracy na terytoryi Polščy redakcyi biełaruskaha internet-partału «Chartyja-97» (charter97.org). Paśla taho, jak u 2010 hodzie ŭ vyniku brutalnych represij supracoŭniki «Chartyi» byli vymušanyja źjechać ź Biełarusi, mienavita Polšča nadała dapamohu, jakaja dazvoliła ŭznavić pracu redakcyi.
Siońnia Biełaruś znachodzicca ŭ składanym stanoviščy. Ciapier našaja kraina ŭ vyniku papuščalnictva i sadziejničańnia kiroŭnamu režymu apynuŭsia ŭ rasiejskim infarmacyjnym poli. Na biełaruskaje hramadstva štochvilinna abrynajecca mahutny strumień maskoŭskaj prapahandy.
U internet-prastory biassprečnym lidaram supracivu infarmacyjnaj ahresii źjaŭlajecca lehiendarnaja «Chartyja-97» — pieršy i, niahledziačy na sproby režymu zabłakavać jaho, samy papularny biełaruski hramadska-palityčny sajt.
Ale ciapier padtrymka z boku Polščy pamianšajecca da sumy, pry jakoj vykanańnie redakcyjaj sajta svajoj misii robicca niemahčymym.
Strata klučavoha apiryšča supraćstajańnia infarmacyjnaj ahresii ŭ siecivie ŭ čas, kali pahroza našaj niezaležnaści značna ŭzrastaje, moža mieć ciažkija nastupstvy dla našaj krainy.
My źviartajemsia da vas jak da kiraŭnikoŭ polskaj dziaržavy z prośbaj dapamahčy ŭ spravie padtrymki internet-partała «Chartyja-97». Prosim vašaj dapamohi, kab zachavać hety ŭnikalny miedyjaresurs, jaki efiektyŭna supraćstaić rasiejskaj prapahandzie ŭ Biełarusi. My ŭpeŭnienyja, što heta budzie słužyć biaśpiecy i niezaležnaści nie tolki biełaruskaha, ale i polskaha naroda.
Za našu i vašu svabodu!
Z pavahaj,
Stanisłaŭ Šuškievič, pieršy kiraŭnik niezaležnaj Biełarusi
Hienadź Fiadynič, lidar prafźviazu rabotnikaŭ radyjoelektronnaj pramysłovaści
Mikałaj Statkievič, lidar Biełaruskaha Nacyjanalnaha Kanhresu, staršynia partyi «Narodnaja Hramada»
Aleś Bialacki, kiraŭnik pravaabarončaha centra «Viasna»
Uładzimir Niaklajeŭ, lidar Biełaruskaha Nacyjanalnaha Kanhresu
Pavieł Sieviaryniec, sustaršynia partyi «Biełaruskaja Chryścijanskaja Demakratyja»
Jaŭhien Afnahiel, kaardynatar hramadzianskaj kampanii «Jeŭrapiejskaja Biełaruś»
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary