Žychar Słucka adpomściŭ byłoj siabroŭcy, apublikavaŭšy jaje intymnyja foty

26-hadovy žychar Słucka B. z pomsty apublikavaŭ «Ukantakcie» intymnyja fatahrafii svajoj byłoj kachanaj i faktyčna razburyŭ jaje žyćcio — joj pryjšłosia kinuć vučobu, pierśpiektyŭnuju pracu i parvać suviazi ź dziasiatkami svaich znajomych, u tym liku i z rodnymi.

Siabry, kalehi i svajaki dziaŭčyny mahli bačyć parnahrafičnyja foty i teksty. Mužčyna byŭ pryznany vinavatym u raspaŭsiudžvańni parnahrafii. Rašeńnie suda Słuckaha rajona było abvieščana ŭ paniadziełak, 18 sakavika. Jamu pryznačyli pakarańnie:

• 120 hadzin hramadskich rabot,
• štraf 1785 rubloŭ (70 bazavych vieličyń),
• dva hady pazbaŭleńnia voli z adterminoŭkaj na dva hady.

Prysud nie ŭstupiŭ u zakonnuju siłu i moža być abskardžany i apratestavany ŭ apielacyjnym paradku.

Taksama dziaŭčyna padała pazoŭ na adras B. — 100 000 rubloŭ.

Mienavita ŭ takuju ​​sumu Anastasija aceńvała svaje maralnyja pakuty, razburanyja pierśpiektyvy karjernaha rostu na adnym z pradpryjemstvaŭ Słuckaha rajona i ahułam pa svajoj prafiesii. Taksama Anastasii pryjšłosia abarvać usie sacyjalnyja kantakty, tamu što jaje znajomyja, rodnyja i kalehi bačyli hetuju fejkavuju staronku. Reputacyja dziaŭčyny była źniščana.

Na abvinavačanaha B. sudom uskładzienyja abaviazki kampiensacyi maralnaj škody na 10 000 rubloŭ na karyść paciarpiełaj.

Para sustrakałasia bolš za piać hadoŭ, ź ich try hady jany žyli razam.

Kali Anastasija była pa vučobie na siesii, jon pisaŭ joj, što «sumuje i jamu jaje nie chapaje», i prasiŭ dasłać intymnyja fatahrafii. Dziaŭčyna daviarała jamu i dasyłała fota. Jon zachoŭvaŭ ich u tečku na svaim kampjutary. Na sudzie B. skazaŭ, što dasyłać jamu fota «niu» dziaŭčyna stała pa svajoj inicyjatyvie.

B. rastłumačyŭ, što paśla rasstańnia sprabavaŭ naładzić «ź joj adnosiny, ale ŭ jaje ŭžo byŭ inšy mužčyna». Paśla hetaha «ŭ paryvie nianaviści» praciahłaściu ŭ tydzień B. pisaŭ joj paviedamleńni z pahrozami, a zatym stvaryŭ fejkavuju staronku «Ukantakcie» i apublikavaŭ tyja samyja foty, što jana jamu pa davierlivaści dasyłała.

Staronka isnavała tydzień, pakul jaje nie zabłakavali administratary «Ukantakcie».

B. nie sprabavaŭ źviazacca ź dziaŭčynaj i paprasić prabačeńnia. U asabistaj hutarcy z karespandentam haziety «Kurjer» Anastasija raspaviała, što jon, naadvarot, pahražaŭ joj pa telefonie, pakul išło śledstva, ale dakazać jana hetaha nie moža.

• 0
• 0
• 0
• 0
• 0
• 0
• 0
• 0