3 studzienia ŭ Biełaruskim dziaržaŭnym ekanamičnym univiersitecie (BDEU) adbyŭsia schod z zamiežnymi studentami VNU, na jakim raźbiralisia navahodnija incydenty z udziełam studentaŭ z Turkmienistanu, pieradaje Biełsat sa spasyłkaj na «Alternatyŭnyja naviny Turkmienistanu».
Na schodzie dekan pa pracy z zamiežnymi studentami Natalla Skryba skazała, što turkmieny padzialilisia na dźvie hrupy i ŭstupili ŭ bojku z vykarystańniem bitaŭ.
«Razborki takija ŭ miežach ułasnaj nacyi», — kazała Skryba.
U navahodniuju noč turkmienskija studenty ŭzryvali na terytoryi internatu pietardy. Milicyjanty, jakija pryjechali, situacyju nie vypravili — pjanyja turkmieny pačali kidać pietardy i ŭ ich.
«Dumaŭ, vajna pačałasia», — pryvioŭ padčas schodu słovy kalehi namieśnik dekana fakultetu prava Jaŭhien Astapaŭ.
Prarektar pa vychavaŭčaj pracy ŭniviersitetu Siarhiej Skryba zaklikaŭ studentaŭ da adkaznaści.
«Ja nie viedaju, čym skončacca dva vypadki: adzin vypadak — bojka, druhi — kinutaja [u ludziej] pry słužbovym vykanańni pietarda — jany byli z aŭtamatami. Mahło adbycca ŭsio, što zaŭhodna, — zajaviła Skryba. — My ŭsie chočam, kab usie vy pajechali z dobraj reputacyjaj».
Namieśnik dekana pa pracy z zamiežnymi navučencami Alena Kalada skazała, što ni adnamu biełarusu i ŭ hałavu nie pryjšło b kidać pietardy z voknaŭ:
«Da hetaha mahli dadumacca tolki vy [turkmieny]… Kidać pietardy [z akna] — heta kaža ab vašych razumovych zdolnaściach».
Natalla Skryba: «Chto pryjšoŭ nie zusim u narmalnym stanie, treba razumieć — dajści da [svajho] pakoja i lehčy [spać]». Praź niekalkich parušalnikaŭ uražańnie składajecca ab usioj nacyi ŭ cełym.
Pradstaŭniki administracyi vučelni kažuć, što nie raz byvali ŭ Turkmienistanie, mieli znosiny z roznymi ludźmi, u tym liku i z baćkami studentaŭ, ale tam nazirali zusim inšuju mientalnaść.
«Jaki sabaka vas kusaje, kali vy siudy pryjazdžajecie?! Čamu vy mianiajeciesia dyjamietralna procilehła?! Tam vy inšyja, a tut vy… Što adbyvajecca? Vola? Svaboda? Jašče niešta? Da kožnaha z vas milicyjanta ci vychavalnika nie prystaviš», — dadaŭ Jaŭhien Astapaŭ.
Pavodle BDEU, turkmienskija navučency parušajuć rasparadak internatu nie tolki padčas śviataŭ, ale i ŭ zvyčajnyja dni: u pakojach, dzie pražyvajuć turkmieny, brudna, z voknaŭ na vulicu laciać pakiety z-pad małaka i inšaje śmiećcie.
Administracyja vučelni vymušanaja sialić studentaŭ z Turkmienistanu tolki razam: dośvied pakazaŭ, što jany nie ŭžyvajucca ź inšymi zamiežnikami. Prablemaj u 2013-m zaniepakoiŭsia navat Alaksandr Łukašenka, jaki prapanavaŭ pabudavać dla studentaŭ z Turkmienii «vyspu» z hatelami i internatami.
U biełaruskich VNU navučajecca kala 8 tysiač studentaŭ z Turkmienistanu, kala 300 ź ich — u BDEU. Biełaruskija vučelni achvotna biaruć ich, bo vučacca jany płatna. U Turkmienistanie ž biełaruskaja adukacyja ličycca jeŭrapiejskaj i niedarahoj.
Kamientary