Novyja RŁS Uzbrojenych sił Ukrainy bazujucca na biełaruskim šasi «Vołat»
Va Ŭkrainie pry stvareńni novych radyjolakacyjnych stancyj vykarystoŭvajuć šasi Volat Mienskaha zavodu kołavych ciahačoŭ, pieradaje radyjo «Svaboda».
Prezydent Ukrainy Piatro Parašenka na svajoj staroncy ŭ Facebook anansavaŭ uzory novaha pakaleńnia techniki, jakaja nieŭzabavie pastupić na ŭzbrajeńnie ŭkrainskaha vojska.
Havorka pra radyjolakacyjnyja stancyi ŭ farmatie 3D, vyrablenyja na navukova-vytvorčym pradpryjemstvie «Iskra» ŭ Zaparožžy.
Pavodle ŭkrainskaha lidera, u vysokatechnalahičnaj vytvorčaści vykarystoŭvajucca ŭkrainskija kamplektnyja častki.
«Ciapier ukrainskaje nieba nadziejna abaronienaje ad voraha», — zajaviŭ Piatro Parašenka.
Jak vynikaje z admysłovaha rolika, pierasoŭnaja stancyja bazujecca na biełaruskim šasi. Heta aŭtamabil Volat Mienskaha zavodu kołavych ciahačoŭ. MZKC jość adnym z šaści najbujniejšych suśvietnych vytvorcaŭ šasi dla rakietnych kompleksaŭ, inšych vidaŭ uzbrajeńniaŭ.
Da niadaŭniaha času biełaruskaje pradpryjemstva MZKC aryjentavałasia vyklučna na rasiejski rynak. Na jahonych platformach pierasoŭvajecca praktyčna ŭsia ŭdarnaja siła rasiejskich Uzbrojenych siłaŭ — rakietnyja kompleksy «Iskander», «Śmierč», «Tarnada», «Topal», «Topal-M», «Jars», «Rubiež», S-300 i S-400.
Adnak letaś u traŭni ŭ Nabiarežnych Čaŭnach adbyłasia demanstracyja ciahačoŭ «Płatforma-O» vytvorčaści zavodu specyjalnych aŭtamabilaŭ «Remdyziel» — strukturnaha padraździaleńnia KamAZu. Analityki zrabili vysnovu pra rasiejskuju alternatyvu, jakaja musić pasunuć biełarusaŭ z tryvałych pazycyj.
Niezadoŭha da taho premjer-ministar Rasiei Dźmitryj Miadźviedzieŭ zajaviŭ pra pastupovy pieranos vytvorčaści aŭtamabilnaha šasi z MZKC na KamAZ. Asnoŭnaj pryčynaj nazvana toje, što Biełaruś admaŭlajecca pradavać zavod.
Raniej Biełaruś pastaŭlała Ukrainie mašynakamplekty MAZ, ź jakich źbirali armiejskija «Bahdany» dla Ŭzbrojenych sił Ukrainy.
Ciapier čytajuć
«Kali pasadziać znoŭ, to pasiadžu». Pačobut pra svajo vyzvaleńnie, kamiery śmiarotnikaŭ, bitvu za honar u sudzie i žadańnie viarnucca13
Kamientary