Mužčyna, vyratavany z bałota miž Sierabrankaj i Łošycaj, napisaŭ vyratavalnikam dušeŭnuju padziaku
Pres-słužba MNS u svaim tvitary apublikavała dušeŭny vodhuk vyratavanaha mužčyny, jaki toj dasłaŭ praź internet.
«Ja chaču vykazać samyja vializnyja i hučnyja słovy PADZIAKI tym ludziam, jakija nočču vyratavali mnie žyćcio i, dziakujučy jakim, ja ranicaj znoŭ raspluščyŭ vočy i praciahvaju žyć. DZIAKUJ toj dziaŭčynie ŭ słužbie vyratavańnia, jakaja padtrymlivała mianie pa telefonie i abnadziejvała, što mianie abaviazkova znojduć i vyratujuć. Ja išoŭ z Łošycy ŭ Sierabranku i zachacieŭ zrezać praz most, ale zabłukaŭ i trapiŭ u bałota, mianie zasmaktała i vykaraskacca sam ja ŭžo nie moh. Ja źmierz i ŭ mianie adniało nohi. Samaja ščyraja i biaskoncaja PADZIAKA tym dvum chłopcam z MNS, jakija niejkim cudam zdoleli mianie znajści i dastać z hetaha viru… jany padaryli mnie žyćcio. Alaksiej i Mikita (proźviščaŭ nie viedaju). Dziakuj usiamu MNS za toje, što vy jość, i za toje, što ŭ vas pracujuć prafiesijanały, jakija zaŭsiody dapamohuć u biadzie», — napisaŭ mužčyna.
«Naša Niva» daviedałasia imiony tych hierojaŭ — heta staršy lejtenant Alaksiej Klimaševič i staršy praparščyk Mikita Dziarhaj, abodva słužać u pažarnaj avaryjna-vyratavalnaj čaści №3 Zavodskaha adździeła Minska.
Jany ŭ pryciemkach znajšli mužčynu i vyciahnuli jaho: ludzi ŭ sacyjalnych sietkach pišuć, što bačyli, jak u subotu, 2 śniežnia, mašyna MNS z łodkaj na pryčepie niesłasia pa horadzie.
A imia žančyny-apieratara, jakaja ŭvieś čas padtrymlivała paciarpiełaha, — Ina Varańko, dyśpietčarka Minskaha haradskoha ŭpraŭleńnia MNS.
Kamientary