Na pasadu kiraŭnika muzieja narodnaha humaru šukajuć ukrainca: «Biełarusy ŭładkavanyja, a susiedziam treba dapamahčy»
Na dniach na ŭkrainskim sajcie vakansij źjaviłasia cikavaja abjava: u ahrasiadzibu-muziej biełaruskaha narodnaha humaru ŭ Małych Aŭciukach šukajecca kiraŭnik-administratar.
Žančyna ci mužčyna — nie važna. Hałoŭnaje — mieć žadańnie i mahčymaść pierajechać u Biełaruś na stałaje miesca žycharstva, pažadana razam ź siamjoj. Pracaŭnikoŭ zabiaśpiečać vidam na žycharstva, a taksama katedžam z usimi vyhodami. Hałoŭnyja abaviazki: kiravać dziejnaściu ahrasiadziby, pravodzić tam viasielli, jubilei i prymać turystyčnyja hrupy.
Nam stała cikava, čamu pracu prapanoŭvajuć mienavita ŭkraincam. Chiba siarod biełarusaŭ nie znajšłosia vartych kandydatur? Voś što na hetak adkazaŭ pradprymalnik Alaksandr Drahun:
«Ja sam pražyŭ va Ukrainie 15 hadoŭ, maju žonku adtul, źjaŭlajusia namieśnikam staršyni Usieŭkrainskaha sajuza Biełarusi. Kali kazać ščyra, darosłyja biełarusy (a ja šukaju ludziej na pasadu va ŭzroście, z dośviedam) bolš-mienš pry pracy i žytle, a voś pierasialencam z Ukrainy, z Danbasa treba dapamahać. Akramia taho, u nas ža muziej narodnaj tvorčaści, a ŭkraincy vielmi lubiać tancy, pieśni, vyšyvanki — siarod ich lohka znajści čałavieka, jaki padychodzić na hetuju pasadu».
Dapamahać ukraincam-pierasialencam Alaksandr pačaŭ, jak tolki na ŭschodzie susiedniaj krainy pačaŭsia ŭzbrojeny kanflikt: u jaho adsiedžvalisia biežancy, pakul im rychtavali nieabchodnyja dakumienty.
Vakansiju z abaviazkami kiraŭnika ahrasiadziby mužčyna raźmiaściŭ 14 žniŭnia i ŭžo atrymaŭ šmat reziume jak ad ukraincaŭ, što pierajechali raniej, tak i ad tych, chto tolki płanuje. Kankretnyja ličby zarpłaty, na jakuju mohuć pretendavać kandydaty, pradprymalnik nie nazyvaje, ale kaža, što mužčynu zdoleje ŭładkavać u kałhas, a jaho žonka, kali takaja budzie, za kožnaje mierapryjemstva ŭ ahrasiadzibie budzie atrymlivać kala 200-400 rubloŭ.
Muziej biełaruskaha narodnaha humaru ŭ vioscy Małyja Aŭciuki adkryŭsia ŭ 2012 hodzie: na jaho prezientacyi prysutničaŭ tahačasny ministr kultury Pavieł Łatuška. A z 1995 hoda ŭ Aŭciukach pravodzicca Usiebiełaruski fiestyval humaru.
Kamientary